Алматы облысының дін істері басқармасы діни экстремизмге қарсы күрес пен дәстүрлі құндылықтарды дәріптеу мақсатында арнайы комикстер дайындауға 19 миллион теңгеден астам қаражат бөлген. Бұл ақпарат мемлекеттік сатып алу порталында жарияланды, деп хабарлайды Ulysmedia.kz.
ЖОБА ҚҰНЫ – 19,7 МЛН ТЕҢГЕ
Басқарма жалпы құны 19 701 000 теңге болатын келісімшарт аясында қазақ қоғамының дәстүрлі құндылықтарын насихаттайтын комикстер әзірлеуді тапсырып отыр. Техникалық сипаттамаға сәйкес, бұл жобаның мақсаты – оқырмандарды қазақ тарихындағы танымал тұлғалармен таныстыру. Олардың қатарында – батырлар, зиялы қауым өкілдері және ел есінде қалған тарихи қайраткерлер бар.
10 КОМИКС ЕКІ ТІЛДІ ЖАРЫҚ КӨРЕДІ
Жоба аясында кем дегенде 10 анимациялық комикс дайындалып, қазақ және орыс тілдерінде жарық көреді. Әр комикс 15 беттен кем болмауы тиіс және олар баспа нұсқада да, электронды форматта да қолжетімді болады.
КОМИКС МАЗМҰНЫ
Шартқа сәйкес, әр комикстің дизайны, форматы мен мазмұны тапсырыс берушінің келісімімен бекітіледі. Жалпы кемінде 1000 дана басылып шығуы тиіс. Ал әр жеке комикстің таралымы 100 данадан төмен болмауы керек.
Комикстердің сценариі тек дәстүрлі құндылықтарды ғана емес, діни экстремизм мен терроризмге қарсы күрес тақырыптарын да қамтуы тиіс. Сонымен қатар, оқырманға патриоттық сезім, туған елге деген махаббат, қазақ фольклоры мен тарихи оқиғаларға қызығушылық дарыту көзделіп отыр.
ВИДЕОКОМИКСТЕР ДЕ БОЛАДЫ
Жоба тек қағаз жүзіндегі комикстермен шектелмейді. Сценарийлер мақұлданғаннан кейін, 10 видеокомикс әзірленеді. Олар да қазақ және орыс тілдерінде болады, әрі кәсіби дыбыстаумен сүйемелденеді.
ЖҰМЫС ТОБЫ
Комикстерді жасауға сценарист, суретші-иллюстратор, колорист, дыбыс режиссері, тарихшы, дінтанушы және мәдениеттанушы мамандар тартылады.
Жобаның аяқталу мерзімі – 15 желтоқсан 2025 жыл
Жоба 2025 жылдың 15 желтоқсанына дейін аяқталуы тиіс. Жұмыс соңында орындаушы шығармашылық есеп тапсырады.