Қуандық Бишімбаевтың отбасы балаларына алимент төлеуден бас тартты. Бұл туралы Бишімбаевтың бұрынғы әйелі Назым Қахарман мәлім етті, деп хабарлайды Ulysmedia.kz.
НАЗЫМ ШЫНДЫҚТЫ ЖАЙЫП САЛДЫ
Бұрынғы күйеуінің туысының сынына жауап ретінде Назым әлеуметтік желіде видео жариялап, өзі жайлы тараған қауесеттерге тоқтау салғысы келетінін айтты. Оның айтуынша, соңғы кездері өзіне қатысты жалған ақпараттар көп таралып кеткен.
“БАЛАЛАРДЫҢ ДЕМАЛЫСЫ ДА, ПСИХОЛОГ ТА ТӨЛЕНГЕН ЖОҚ”
Назым Қахарман былтыр балаларының демалысына және психологқа төленбегенін айтып, бұған қатысты барлық түбіртектерді жинап, адвокат Ғазымжановқа жолдағанын мәлімдеді.
- Былтыр балалардың демалысы да, психолог қызметі де төленген жоқ. Барлық түбіртектерді жолдадым. Бір жарым жылдың ішінде қомақты сома жиналды. Бірақ адвокатқа жібергеніме қарамастан, оны елемей қойды, дейді Назым.
ДӘРІГЕР МЕН ДӘРУМЕНДЕРДІҢ АҚШАСЫ
Назымның айтуынша, тек демалыс пен психолог қызметі емес, тіпті дәрігерге қаралу мен дәрумен сатып алуға да ақша бөлінбеген. Сонымен қатар, 2020 жылы экс-күйеуі Бишімбаевпен ажырасу кезінде келісілген алиментті де үнемі еске салып отыруына тура келетінін айтады.
“АЛИМЕНТ ТУРАЛЫ АЙ САЙЫН ЕСКЕ САЛУҒА МӘЖБҮРМІН”
- Маған үнемі еске салып отыруға тура келеді. Адвокат Баянға жаза беремін. Мысалы, бүгін – 28 наурыз. Осы күнге дейін наурыз айының алименті әлі түскен жоқ. Оларды тұрақты түрде аудара бастағандары тек өткен жылдың қараша-желтоқсан айларынан бастап қана, деді Назым.
АЛИМЕНТ ТӨЛЕУДЕН ТОЛЫҚ БАС ТАРТҚАН
Назымның бейнеүндеуінде экранда “30 наурызда Бишімбаевтар отбасының адвокаты маған хабарласып, алимент төлеуден толық бас тартқандарын айтты” деген жазба пайда болды.
НАЗЫМНЫҢ СҰХБАТЫ
Еске салайық, он ай бұрын Назым Қахарман Ұлысмедиа порталының YouTube-арнасына арнайы сұхбат берген болатын.
БИШІМБАЕВ ІСІ
Еске сала кетсек, 13 мамырда Астанада әйелін аса қатігездікпен қинап өлтірді деп айыпталған экс-министр Қуандық Бишімбаевқа сот үкімі шыққан еді. Астана қаласындағы қылмыстық істер жөніндегі мамандандырылған ауданаралық сотында әйелін аса қатігездікпен өлтірді деп айыпталған экс-министр Қуандық Бишімбаев 24 жылға сотталды.
Астанадағы "Гастро-орталық" директоры, Бишімбаевтың туысы Бақытжан Байжанов Салтанат Нүкенованың өліміне байланысты іс бойынша "қылмысты жасырды" деген күдікпен сотқа тартылған. Сот үкімімен ол 4 жылға бас бостандығынан айырылды.