Мәскеу мен Астананың антиресейлік санкциялар жағдайындағы ынтымақтастығы жөнінде саясаттанушы Сергей Маркелов пікір білдірді, деп хабарлайды Ulysmedia.kz.
Царьград басылымы сілтеме жасаған саясаттанушының айтуынша, қазір Қазақстанда санкциялардан қашқақтаған көптеген ресейлік өндірістер шоғырланған. Оның сөзінше, Ресейдің барлық негізгі шикізат компанияларының штаб-пәтерлері Қазақстанда орналасқан. Бұған тек энергетика, мұнай және газ салалары ғана емес, сондай-ақ көмір, полиметалл өндірісімен айналысатын кәсіпорындар да кіреді.
Қазақстан бұдан тек ұтты, – деп сенімді түрде мәлімдеді сарапшы Сергей Маркелов.
Басылымның жазуынша, Қазақстан жиі Ресейдің негізгі одақтастарының бірі ретінде қарастырылғанымен, шын мәнінде жағдай әлдеқайда күрделі болуы мүмкін. Географиялық тұрғыдан алғанда, Қазақстан Қытай мен Ресейдің ортасында орналасқан, бұл оны саяси маневр жасауға мәжбүрлейді. Батыс елдерінің Ресейге қарсы енгізген санкциялары әлемдік экономикалық және сауда картасын айтарлықтай өзгертіп отыр.
Қазақстан біз үшін неге маңызды? Ол 80 пайызға біз секілді шикізаттық экономикаға негізделген, сондықтан біз бір-бірімізді жақсы түсінеміз. Қазақстан арқылы Қытаймен байланысты жобалар жүзеге асып, кері бағытта Қытай, Қазақстан және Ресей арасындағы сауда-саттық жүреді. Қазақстан Қырғызстан секілді қарапайым тұтыну тауарларымен ғана шектелген жоқ. Мұнда зауыттарға қажетті станоктар, жабдықтар, арнайы технологиялық жүйелер келеді. Бұлар Ресейдегі арнайы әскери операция кезінде бұзылған өндірістік тізбектерді қалпына келтіруге көмектеседі. Ауыр өнеркәсіп жабдықтарының тұрақты жеткізілуіне мүмкіндік жасаған Қазақстанға алғысымыз шексіз.
Екінші жағынан, Қазақстан бізге кері бағытта да ықпал етіп отыр – белгілі бір тауарлар ресейлік нарыққа Қазақстандағы еншілес кәсіпорындар арқылы қайта оралады. Сонымен қатар, Қазақстан біздің қаржылық мәселелерімізді шешуге де көмектесуде. Яғни, асыра сілтеусіз, байбалам салмай, қазақстандық банктер Ресейдің SWIFT жүйесінен ажыратылуымен байланысты қиындықтарды айналып өтуге ықпал етіп отыр, – деп түйіндеді Маркелов.
Бұған дейін Ресейден қоныс аударғандар Қазақстандағы өмір жайлы пікір білдірген болатын.