2025 жылдың 4 сәуірінде Ресей әскерлері Украинаның Кривой Рог қаласына кезекті зымыран соққысын жасады. Украина билігінің мәліметінше, баллистикалық зымыран тұрғын үй орналасқан ауданды көздеген, деп хабарлайды Ulysmedia.kz.
ҚАЗА ТАПҚАНДАР АРАСЫНДА БАЛАЛАР ДА БАР
Алғашқы деректерге сай, 12 адам қаза тауып, шамамен 50 адам жарақат алған.
Днепропетровск облыстық әскери әкімшілігінің басшысы Сергей Лысактың айтуынша, мерт болғандардың үшеуі – балалар. Жарақат алғандар саны уақыт өткен сайын артып келеді. Зымыран "Магеллан" мейрамханасының маңында жарылғаны хабарланды. Салдарынан жақын маңдағы тұрғын үйлердің терезелері сынған, бірнеше көлік отқа оранған.
ЗЕЛЕНСКИЙ РЕСЕЙДІ ҚАТАҢ СЫНАП, ӘЛЕМГЕ ЖҮГІНДІ
Украина президенті Владимир Зеленский Кривой Рогтағы шабуылға байланысты пікір білдірді. Ол Ресейдің күн сайын соққы жасап, бейбіт тұрғындарды өлтіріп жатқанын мәлімдеді:
"Күн сайын ресейлік соққылар. Күн сайын адам өлімі. Бұның жалғыз себебі бар – Ресей бітімге келуді қаламайды, және біз мұны көріп отырмыз. Бүкіл әлем көріп отыр. Әрбір зымыран, әрбір дрон – Ресей тек соғыс қана қалайтынын дәлелдейді", – деді Зеленский.
Президенттің айтуынша, шабуыл тұрғын үйлер орналасқан ауданға бағытталған. Оның сөзінше, қаза тапқандар саны 14-ке жеткен, олардың арасында алты бала бар.
РЕСЕЙЛІК ӘСКЕРИЛЕР ӘЗІРГЕ ТҮСІНІКТЕМЕ БЕРМЕДІ
Ресей тарапы Кривой Рогқа жасалған бұл соққыға қатысты әзірге ресми түсініктеме берген жоқ. Алайда бір күн бұрын ғана дәл осы қалаға жасалған тағы бір соққыдан кемінде төрт адам қаза тауып, 14 адам жарақат алған болатын.