Алматы полиция департаментінің экстремизмге қарсы күрес басқармасының қызметкерлері халықаралық іздеуде жүрген Ресей Федерациясының азаматын ұстады, деп хабарлайды Ulysmedia.kz.
МӘН-ЖАЙ
Іздеу салуға Ресей Федерациясының Краснодар өлкесі бойынша Федералдық қауіпсіздік қызметінің басқармасы бастамашы болған.
Ұсталған азамат ұйымдасқан қылмыстық топ құрамында аса ірі көлемде алаяқтық жасады деген күдікке ілінді. Қолда бар мәліметтер бойынша мемлекетке келтірілген шығын көлемі 23 миллион рубльден (137 599 260 теңге) асады.
ЭКСТРАДИЦИЯ МӘСЕЛЕСІ
Жедел-іздестіру іс-шаралары барысында іздеуде жүрген күдіктінің орналасқан жері туралы ақпарат алынды.
"Алматы полициясы күдіктіні ұстады. Қазіргі уақытта ол уақытша ұстау изоляторына қамалды, оған қатысты экстрадициялау ісі басталды", - деді Алматы полиция департаменті экстремизмге қарсы күрес басқармасының бастығы Асхат Дәулетияров.
БҰҒАН ДЕЙІН
Еске салайық, бұған дейін Қазақстан полицейлері Беларусь еліне Морозов бандасының мүшесі – Виктор Грецкийді экстрадициялады. Ол Қостанайда ұсталды. Беларусь ІІМ-нің мәліметінше, киллер заң органдарынан 20 жыл бойы жасырынып келген.