Сыртқы істер министрінің орынбасары Әлібек Қуантыров АҚШ-тың Қазақстан тауарларына 27% баж салығын енгізуіне қатысты пікір білдірді, деп хабарлайды Ulysmedia.kz.
ҚУАНТЫРОВ НЕ ДЕЙДІ
- Қазіргі уақытта бұл мәселені зерттеп жатырмыз. Себебі баж салығы көп. Қателеспесем 20 пайыздан асып кетті. Сондықтан бұл мәселе үкіметте талқыланып жатыр, дейді Қуантыров.
ТОЛЫҒЫРАҚ
Еске салайық, 3 сәуірде АҚШ Трамптың жаңа сауда саясаты шеңберінде Қазақстаннан әкелінетін тауарларға 27% мөлшерінде баж салығын енгізетіні белгілі болды. АҚШ президенті Дональд Трамп «әділ бәсекелестікті қалпына келтіру» және америкалық өндірушілерді қорғау мақсатында жаһандық өзара сауда баждарын енгізетінін мәлімдеді.
Бұл бастама аясында Қазақстан АҚШ-тың жаңа тарифтік саясатына іліккен елдердің қатарына енді. Енді Қазақстаннан әкелінетін импорттық тауарларға 27% мөлшерінде баж салығы салынады.
Кей жағдайда сауда тұрғысынан алғанда дос жаудан да қауіпті, – деп мәлімдеді Ақ үй басшысы АҚШ-тың шетелдік серіктестермен экономикалық қарым-қатынасына қатысты жаңа ұстанымын түсіндіре отырып.
Бұл бастаманың мәні – өзара тарифтерді енгізу. Трамптың логикасы бойынша, егер бір ел америкалық тауарларға баж салығын енгізсе немесе өз өндірушілеріне артықшылықтар берсе, АҚШ та дәл сондай шаралармен жауап қайтарады – сол елден келетін экспортқа сәйкесінше баж салығы салынады.
Жаңартылған тізімге АҚШ-тың жаңа сауда шектеулерін ескеруі тиіс ондаған мемлекет енген. Ең жоғары тарифтер Камбоджаға (49%), Мадагаскарға (47%), Вьетнамға (46%), Шри-Ланкаға (44%) және Мьянмаға (44%) белгіленген. Қазақстан үшін бұл көрсеткіш – 27%.