Қазақстанда мемлекеттік қызметте 800-ден астам зейнеткер жұмыс істеп жүр

“ӨЗАРА КЕЛІСІП, ЖҰМЫС ІСТЕП ЖҮР”

Депутаттың Facebook-тегі жазбасында олардың барлығы жұмысын «өзара келісім» негізінде жалғастырып отырғаны айтылған. Мұнда ең алдымен әкімшілік мемлекеттік лауазымдар туралы сөз болып отыр — дәл осы санатта келісімшарттар жыл сайын жаппай ұзартылып келеді.

Құжат жүзінде бұл тәжірибе — тәжірибеге құрмет көрсету ретінде көрінеді.

- Бірақ біз нақты білеміз: кей жағдайларда мұндай ұзарту бірегейлікпен, ерекше құзыреттілікпен немесе кадр тапшылығымен байланысты емес. Көп жағдайда бұл — бірінші басшының шешімі немесе сырттан келген өтініштер, тапсырмалар. Оған жай ғана «өзінің» адамын қалдыру ыңғайлы. Конкурстан тыс. Объективті бағалаусыз. Негіздемесіз, дейді депутат.

Мәжілісмен нақты мысалдар келтіріп, кейбір мемлекеттік органдар мен аймақтарда зейнет жасындағы қызметкерлердің саны ерекше көп екенін атап өтті:

• Қаржы министрлігі – 89 адам
• Денсаулық сақтау министрлігі – 73
• Ауыл шаруашылығы министрлігі – 43
• Ақмола облысы – 53
• Павлодар облысы – 37
• Қарағанды облысы – 34
• Қостанай облысы – 32
• Абай облысы – 35

Депутат бұл құбылысты кездейсоқтық деп санауға болмайтынын айтып, басқарушылық шешімдерге жауапкершілікпен қарау қажеттігін алға тартты.

КВАЗИМЕМЛЕКЕТТІК СЕКТОРДАҒЫ ЖАҒДАЙ

Әлиевтің айтуынша, квазимемлекеттік сектордағы жағдай бұдан да күрделі. Ұлттық компаниялар мен холдингтерде жас ерекшелігіне немесе келісім мерзіміне қатысты ешқандай шектеу жоқ. Зейнет жасындағы қызметкерлер ондаған жыл бойы бір орында отырып, өз «тұлғалық жүйесін» қалыптастырып алған.

— Мұндай құрылымдарда формалды түрде «алмастырылмайтын» бухгалтерлер, заңгерлер, кадр бөлімінің мамандары отыр. Бірақ олар қандай ерекше қабілеті үшін жұмысын жалғастырып отыр? Электронды жүйемен жұмыс істей алмайтын, WhatsApp-тан басқа бағдарлама ашпайтын бұл қызметкерлер жастарға жол бермей отыр, — дейді депутат.

ЖҮЙЕ ӘДІЛ БОЛУЫ ТИІС

Болатбек Әлиев әділеттілік қағидатына негізделген жүйе қажет екенін айтты.

— Егер сіз расымен бірегей маман болсаңыз – қалуыңызға болады. Ал тек «ыңғайлы адам» болсаңыз – абыроймен кететін уақыт келді. Біз шарттарды инерциямен ұзартып жатқанда, қабілетті жастар шет елге кетіп жатыр. Себебі олар әлсіз емес — оларға мүмкіндік берілмеген.

ТЕКСЕРУ

Депутат басқарып отырған комитет зейнет жасындағы мемлекеттік қызметкерлерге қатысты келісімшарттардың не себептен ұзартылғанын талдауды кезең-кезеңімен бастамақ. Әрбір министрлік пен әкімдікке нақты сұрақтар қойылады.

Сонымен қатар, ол мемлекеттік қызмет істері агенттігімен бірлесіп:

• Келісімшарттарды жаңарту тәртібін қайта қарауды,
• Жас әрі білікті мамандардың ілгерілеуіне жағдай жасауды,
• Жүйенің жаңаруын қамтамасыз етуді ұсынды.

— Бұл – нақты кадрлық реформа болуы керек. Жай сөз емес, нақты өзгеріс. Жүйе жаңармай қалса – іштен іри бастайды. Бұған жол беруге болмайды, – деді депутат.