Ыстамбұлға "Россия" жазғы отрядының арнайы Ил-62М ұшағы келіп қонды, деп хабарлайды Ulysmedia.kz порталы Flightradar24 порталына сілтеме жасап.
Оның дерегінше, RA-86559 борттық нөмірі бар әуе кемесі Мәскеу облысындағы «Чкаловский» аэродромынан ұшып шығып, Ыстамбұлдағы Ататүрік атындағы әуежайға қонған.
Бұл әуежайдан азаматтық рейстер 2018 жылы жаңа Ыстамбұл әуежайы ашылғаннан кейін сонда ауыстырылған. Қазір Ататүрік әуежайы, қаланың тарихи орталығына жақын орналасқандықтан, әскери және үкіметтік авиацияға қызмет көрсетеді.
Ыстамбұлға ресейлік делегация мүшелері келген болуы мүмкін, олар бейсенбіде украиналық ресми тұлғалармен кездесуі тиіс. Бортта нақты кімдер болғаны белгісіз.
КЕЛІССӨЗ
Ыстамбұлда Ресей мен Украина арасындағы тікелей келіссөздер өтуі жоспарланған . Бұл – 2022 жылдан бері алғаш рет ұйымдастырылып отырған жоғары деңгейдегі кездесу. Келіссөздерге екі тараптың делегациялары қатысады. Украина президенті Владимир Зеленский Ресей президенті Владимир Путинді Ыстамбұлда күтетінін айтқан. Алайда Путин Түркияға бармайды. Кремльдің хабарлауынша, ресейлік делегацияны президенттің көмекшісі Владимир Мединский басқарады. Делегация құрамында қорғаныс министрлігі, сыртқы істер министрлігі және президент әкімшілігінің өкілдері бар.
Украина тарапынан келіссөздерге президент кеңсесінің басшысы Андрей Ермак, қорғаныс министрі Рустем Умеров, сыртқы істер министрі Андрей Сибига және президент кеңесшісі Игорь Жовква қатысады.
Президент Владимир Зеленский Түркияға ұшып кеткенімен, ол Анкараға барады, ал келіссөздер Ыстамбұлда өтеді. Оның келіссөздерге тікелей қатысатыны немесе қатыспайтыны әзірге белгісіз.
Келіссөздер 2022 жылы Ыстамбұлда басталған, бірақ тоқтап қалған бейбітшілік келісімінің жобасын қайта қарастыруды мақсат етеді .
Келіссөздерге АҚШ-тың арнайы өкілдері Стив Уиткофф пен Кит Келлогг, сондай-ақ Мемлекеттік хатшы Марко Рубио қатысады.