ТОЛЫҒЫРАҚ
23 маусымда Сенат кейбір баптармен келіспей, кодексті Мәжіліске кері қайтарған болатын. Жоғарғы палата депутаттары келесі түзетулерді ұсынды:
- Шаруа немесе фермер қожалықтарының табысына қатысты жеке табыс салығын (ЖТС) прогрессивті тәртіппен енгізу. Бұған дейін Үкімет азаматтардың жиынтық табысы 8500 АЕК-тен, ал жалпы тәртіппен жұмыс істейтін жеке кәсіпкерлердің табысы 230 000 АЕК-тен асқан жағдайда 15% мөлшерлеме қолданылатын прогрессивті ЖТС енгізуді ұсынған.
- KASE-де айналымда жүрген бағалы қағаздардан түсетін табыс түріндегі дивидендтерді ЖТС-тан босату жөніндегі салықтық жеңілдік.
- Төлем карталарына қатысты операцияларды қосылған құн салығынан (ҚҚС) босату жеңілдігі.
Сән-салтанат бұйымдарын салық салу бойынша жеке нормалар. Мұндай акциздің төлеушілері тек жеке тұлғалар болады. Автокөлік, кеме және ұшу аппараттары секілді сән-салтанат заттарына акциз тек импортта емес, ел ішінде сату кезінде де салынады. Егер олардың құны мына шекті сомадан асса:
– автокөлік үшін – 75 млн теңгеден,
– кемелер мен ұшу аппараттары үшін – 100 млн теңгеден.
Мемлекеттік бағалы қағаздар айналымынан түсетін табыс бойынша бейрезиденттерге берілетін қолданыстағы салықтық жеңілдікті сақтау.
- Салық салу нысаны, салық базасы, салық төлеушілер (салық агенттері) санаттарының кеңейтілуі, шегерімдер мен жеңілдіктердің жойылуы немесе қысқартылуына қатысты Салық кодексіне енгізілетін өзгерістер осы жылдың 1 шілдесінен кешіктірілмей қабылданып, келесі жылдың 1 қаңтарынан ерте күшіне енбеуі тиіс деген толықтыру енгізіледі;
- Камералдық бақылау нәтижесінде анықталған сәйкессіздіктер бойынша салық төлеушіге жіберілген хабарлама орындалмаған жағдайда, электрондық шот-фактураны тоқтата тұру тәртібі енгізіледі;
- Азаматтық-құқықтық сипаттағы шарттар бойынша табыс алатын жеке тұлғалар үшін әлеуметтік аударымдарға салықтық шегерім қарастыру көзделген;
- Мүгедектігі бар кемінде 10 қызметкері бар кәсіпорындарда тауарлар, жұмыстар мен қызметтерді өткізу айналымын ҚҚС-тан босату нормасы енгізіледі;
- Отандық мерзімді басылымдарды өткізу айналымына 10% мөлшерінде ҚҚС мөлшерлемесі белгіленеді;
- Бірінші санаттағы өмірлік маңызы бар нысандар үшін қоршаған ортаға теріс әсері үшін төленетін төлем мөлшерлемелерін бұрынғы деңгейде сақтау көзделеді;
- Арнайы салық режимін қолданатын шаруа немесе фермер қожалықтарының табысы ретінде өтеусіз алынған мүлік құны есепке алынбайды;
- Әлеуметтік маңызы бар азық-түлік тауарларын өткізу айналымын ҚҚС-тан босату нормасын алып тастау ұсынылады.
ЖАҢА САЛЫҚ КОДЕКСІНДЕ:
ҚҚС төлеу үшін табыс шегі – 40 млн теңге болып белгіленді, мөлшерлемесі – 16%;
Әлеуметтік сала мен денсаулық сақтау саласында үкімет ҚҚС-тан босатылатын дәрі-дәрмектердің әлеуметтік тізбесін бекітеді;
Дәрі-дәрмектер мен медициналық қызметтерге төмендетілген ҚҚС мөлшерлемелері енгізіледі: 2026 жылдан бастап – 5%, 2027 жылдан бастап – 10%.