АҚШ билігі 27 тамыз күні 30-дан 60-қа дейінгі Ресей азаматтарын елден шығарды, деп хабарлайды Ulysmedia.kz.
МӘН-ЖАЙ
Бұл туралы Russian America for Democracy in Russia ұйымының президенті Дмитрий Валуев «Агентство» және Astra-ға растаған.
ДЕПОРТАЦИЯ ҚАЛАЙ ЖҮРГІЗІЛДІ
Валуевтің айтуынша, депортация транзитпен Мысыр арқылы жүзеге асқан. Ресейге иммиграциялық түрмелерде отырған, баспана беруге қатысты сотты ұтылған немесе шешімді күтпей өз еркімен оралуға келіскен азаматтар жеткізілді.
КІМДЕР ЕЛДЕН ШЫҒАРЫЛДЫ
Депортацияланғандардың арасында Ресейде саяси қудалаудан қорыққан адамдар да болған. Олардың ішінде әскери бөлімді өз еркімен тастап кеткен іс бойынша айыпталған бұрынғы әскери қызметкер бар. Кем дегенде бір адам Ресейге оралған соң ұсталған.
ҚЫСЫМ
28 тамызда «Гулагу.нет» жобасының негізін қалаушы Владимир Осечкин бұл жаппай депортация жайлы алғаш хабарлаған. Оның мәліметінше, Ресейге оралғандардың кейбірін бірнеше сағат бойы тергеп, кейбірін ұрып-соққан.
КОНТЕКС
Бұл жазда болған екінші жаппай депортация. Бұған дейін, маусым айында, АҚШ билігі шамамен 40 ресейлікті отанына қайтарған еді.