Алматы әуежайында бір апта ішінде екінші рет суицид әрекеті тіркелді — жолаушы ішкі рейстер терминалында өзіне зиян келтірмек болды, деп хабарлайды Ulysmedia.kz.
ОҚИҒАНЫҢ МӘН-ЖАЙЫ
Әуежайдың баспасөз қызметінің мәліметінше, Т1 терминалының әжетханасында бір жолаушы өзіне дене жарақатын салуға әрекет жасаған. Жағдайды әуежай қызметкерлері байқап қалып, медицина қызметін шақырған.
Жедел жәрдем жеткенге дейін зардап шеккен адамға алғашқы көмек көрсетілді. Қазіргі таңда оның өміріне қауіп жоқ, дәрігерлердің бақылауында. Әуежай жұмысы қалыпты режимде жалғасты.
ПОЛИЦИЯ НЕ ДЕЙДІ?
Алматы әуежайындағы желілік полиция бөлімінің басшысының орынбасары Өмірхан Садыровтың айтуынша, жаңа оқиға бойынша да қылмыстық іс қозғалды. Оның сөзінше, Алматы – Астана рейсінің жолаушысы тіркеуден өтіп, тексеруден шыққан, бірақ ұшаққа отырмаған.
– Ол шамамен төрт сағат күту залында болған, содан кейін санитарлық бөлмеге кіріп, дене жарақатына әкелген әрекет жасаған, – деді Садыров.
Ер адамға алғашқы медициналық көмек көрсетіліп, қалалық клиникалық ауруханаға жеткізілді. Қазіргі таңда полиция оқиғаның барлық мән-жайын анықтап жатыр.
БҰҒАН ДЕЙІН
25 тамызда Алматы әуежайында тағы бір жағдай тіркелген еді. Ол кезде ер адам өзін-өзі өртеуге әрекет жасап, ауруханаға түскен. Бұл оқиға бойынша да қылмыстық іс қозғалған еді.