Қазақстанның сыртқы істер вице-министрі Әлібек Бақаев бұрынғы басшысы – қазіргі Президенттің көмекшісі болып тағайындалған Мұрат Нұртілеудің отставкасына қатысты пікір білдіруден бас тартты, деп хабарлайды Ulysmedia.kz.
Журналистердің сұрағы
Мәжілісте тілшілер вице-министрден Мұрат Нұртілеудің қызметінен кетуінің себебі және БҰҰ Бас ассамблеясы аясындағы жұмыстарды ұйымдастыру бойынша СІМ-ге жоғарғы билік тарапынан сын айтылды ма деген сауал қойды.
– Мен ондай мәселелерге түсініктеме бере алмаймын. Ешқандай шағым түскен жоқ. Министрлерді тағайындау – мемлекеттің құзырындағы шешім. Бұл – қабылданған шешім. Бұл қызметке тағайындалған алғашқы да, соңғы да министр емес. Оның (Мұрат Нұртілеудің) жұмыс істеген кезеңін жоғары бағалаймын, СІМ бағыты бойынша үлкен жұмыс атқарылды деп санаймын, – деді Бақаев.
Жаңа министр туралы пікірі
Әлібек Бақаев жаңа басшы – Ермек Көшербаевқа да пікір білдірді:
– Ермек Көшербаев өте тәжірибелі тұлға. Бұған дейін СІМ-нің жауапты хатшысы, вице-министрі, Ресейдегі елшісі болды. Дипломатиялық қызметте тәжірибесі мол, – деді ол.
Тағайындау
Еске салайық, бүгін Мұрат Нұртілеу сыртқы істер министрлігі басшысы қызметінен кетті. Оның орнына сыртқы істер министрлігін Ермек Көшербаев басқарады.