Digital Bridge 2025 форумының кулуарында Freedom Holding Corp компаниясының иесі Тимур Турлов биыл қазақстандық БАҚ бірнеше рет жазған «Фридом Финанс» төңірегіндегі дауға пікір білдіруден бас тартты, деп хабарлайды Ulysmedia.kz.
ТОЛЫҒЫРАҚ
- Мен түсініктеме бермеймін, – деп жауап берді ол журналистке.
Осы сәтте оның қызметкерлерінің бірі тілшіні итере бастады. Кейін оған тағы бір қызметкер қосылып: «Біз түсініктеме бермейміз дедік қой» деді.
— Біз онымен сотта кездесіп сөйлесеміз, қазір бұл жайында пікір білдірмеймін, – деді Турлов өз қызметкерлерінің әрекетіне назар аудармай.
КОНТЕКСТ
Сәуір айында «Фридом Финанс» еншілес компаниясының брокерлік қызметінен зардап шеккенін айтқан адамдардың мәлімдемелері пайда болды. Олардың сөзінше, кемінде 30 қазақстандықтың шоттарынан шамамен 2,5 млрд теңге шығарылған.
Қыркүйекте Астанада өткен баспасөз мәслихатында зейнеткер Қарлығаш Қаппарованың оқиғасы жария етілді. Ол «Фридом Финанс» арқылы 380 мың доллардан астам қаржы салған. Оның сенімді өкілі компания қызметкері Темірлан Беков болған. Оның әрекеті бойынша қылмыстық іс қозғалды, бірақ кейін тоқтатылды. Тергеу алаяқтық емес, тек сәтсіз инвестицияға әкелген жеке келісім болды деген шешімге келді.
Тағы бір эпизод «Фридом Финанс» АҚ-ның бұрынғы атқарушы директоры Виталий Световойға қатысты. Ішкі тексеру ол клиенттерді ақшаны компания шотына емес, өзіне аударуға үгіттегенін көрсетті. Кейін ол жұмыстан босатылып, іс материалдары полицияға берілді. Қазір Световой қамауда отыр. Оның әрекетінің салдары қайғылы аяқталды: Петропавлдағы алданған салымшылардың бірі ақшасын жоғалтқаннан кейін өзін-өзі өлтірген. Бұл іс бойынша қылмыстық іс Световойға қарсы іс қозғалғаннан үш күн өткен соң жабылды.
Сонымен қатар, «Фридом Банкі» клиенттері «хаттар» ала бастаған. Онда «ақауға» байланысты олардың мәмілелері Қазақстан қор биржасы (KASE) арқылы өтпегені, сондықтан пайда «тәркіленетіні» және инвестициялар жойылатыны жазылған. Алайда KASE мұндай жағдайға қатысы жоқ екенін бірден мәлімдеді.
Турлов пен оның командасынан ресми түсініктеме болған жоқ. Осы арада қаржы нарығын реттеу және дамыту агенттігі (ҚНРДА) жоспардан тыс тексеріс жүргізіп, «Фридом Финансқа» 40-тан астам айыппұл салғаны хабарланды. Ал зардап шеккендер мұны тек «қағаздағы шара» деп бағалап, шынайы проблеманың ауқымын көрсетпейді дейді.