Варшавада өтіп жатқан ОБСЕ конференциясында Қазақстаннан келген журналистер мен құқық қорғаушылар өз үндерін жеткізді, деп хабарлайды Ulysmedia.kz.
Құқық қорғаушы Бақытжан Төреғожина өз сөзінде Украинада қаза тапқан журналист Айдос Садықов пен экстремизм айыбы тағылған Думан Мұхаммедкаримнің ісін көтерді. Оның айтуынша, Қазақстан билігі Садықов ісі бойынша тергеуден жалтарып, күдіктілерді беруден бас тартып отыр.
Конференция барысында халықаралық ұйымдар Қазақстан билігін бұл саяси өлтіруге қатысы бар барлық тұлғаларды жауапқа тартуға шақырды.
"Думан Мұхаммедкәрімге тағылған айыптар ойдан шығарылған, ал үкім – саяси астарлы. Ол қазір қамауда, өмірі мен денсаулығы қауіпте. Билікке жасалған өтініштер жауапсыз қалуда. ОБСЕ-ден оның үкімін қайта қарауды талап етуін сұраймын", – деді Төреғожина.
АЙДОС САДЫҚОВҚА ЖАСАЛҒАН ШАБУЫЛ ЖӘНЕ ОНЫҢ ҚАЗАСЫ
2024 жылдың 18 маусымында Украина астанасында Айдос Садықовқа шабуыл жасалды. Журналистің әйелі Наталья Садықова шабуыл олардың үйінің жанында болғанын айтты. 2 шілдеде Садықов ауруханада көз жұмды.
ОБСЕ КОНФЕРЕНЦИЯСЫ ЕУРОПАДАҒЫ ЕҢ ІРІ АДАМ ҚҰҚЫҒЫ АЛАҢЫНА АЙНАЛДЫ
Warsaw Human Dimension Conference 2025 Финляндия төрағалығы мен ODIHR қолдауымен ұйымдастырылды. 6–17 қазан аралығында өтетін бұл шара адам құқықтары, демократиялық институттар, БАҚ еркіндігі және заң үстемдігі мәселелерін талқылауға арналған Еуропадағы ең ірі алаңдардың бірі саналады. Конференцияға ОБСЕ-нің 57 елінен, азаматтық қоғамнан, журналистер мен халықаралық ұйымдардан өкілдер қатысуда.