Бұл қаражат кәсіпорынның 75 миллион теңге көлеміндегі салықтық қарызын толық өтеуге жеткілікті еді, деп хабарлайды Ulysmedia.kz.
Абай облысындағы "Семей орманы" филиалы 80 миллион теңгеден астам сомаға бағаланған дайын ағашты заңбұзушылықтарға байланысты іске асыра алмаған. Бұл туралы өңірлік прокуратура хабарлады.
Ұйымға бұрын заңсыз ағаш кесу мен ұрлық үшін жауапкершілікке тартылған қызметкерлер жұмысқа қабылданған. Сондай-ақ, көлік жүргізу құқығынан айырылған арнайы техника жүргізушісі де жұмысқа орналасқан.
«Орман дайындау заңдылығын бақылау бұрын мүліктік және өзге де қылмыстар үшін сотталған өндірістік учаске шеберіне тапсырылған. Дайындалған ағаштың санатын заңсыз түрде арзанырақ түрге ауыстыру фактісі де тіркелген, бұл өнімнің құнын төмендетуге алып келген. Филиал басшылығының тиісті ұйымдастыру жұмыстарының болмауы мен әрекетсіздігі салдарынан 2024 жылдың соңына дейін 4 мың м³-тан астам ағаш іске асырылмаған», – делінген хабарламада.
Қадағалау органының мәліметінше, бұл қаражат кәсіпорынның 75 миллион теңге көлеміндегі салықтық берешегін толық өтеуге мүмкіндік берер еді.
Прокуратура тексеруінен кейін заңсыз жұмыс істеген қызметкерлермен еңбек қатынастары тоқтатылды. Кәсіпорын директоры қатаң сөгіс түріндегі тәртіптік жауапкершілікке тартылып, кейін қызметінен босатылды. Дайындалған ағаш сатылып, салықтық қарыз өтелді.