Қазақстан премьер-министрі Олжас Бектенов VIII Kazakhstan Global Investment Roundtable форумында сөз сөйлеп, жаһандық нарықтардың фрагментациясы мен өңірлік жіктелуіне қарамастан, Қазақстан экономикасы тұрақтылық танытып, өсім көрсетіп отырғанын айтты, деп хабарлайды Ulysmedia.kz.
Экономикалық өсім және инвестициялар
Үкімет дерегінше, 2025 жылдың тоғыз айында елдің жалпы ішкі өнімі 6,3%-ға артқан. Негізгі капиталға салынған инвестиция көлемі 13,5%-ға өсіп, 25,8 млрд долларға жетті.
— Өткен жылы Қазақстан Орталық Азиядағы шетелдік инвестициялардың 63%-ын тартты және теңізге тікелей шығатын жолы жоқ елдер арасындағы бес ірі greenfield-жобаның төртеуін іске асырды, — деді премьер-министр.
Жаңа инвестициялық цикл және инфрақұрылым
Бектенов мемлекет басшысы Қасым-Жомарт Тоқаевтың тапсырмасымен елде жаңа инвестициялық цикл басталғанын еске салды. Оның айтуынша, бұл модельде мемлекет бизнеске тек серік ретінде емес, жаңа салаларды құруға қатысушы ретінде де әрекет етеді.
Премьер-министр Транскаспий халықаралық көлік дәлізін қоса алғанда, инфрақұрылым мен цифрлық технологиялардың дамуына ерекше назар аударды. Оның сөзінше, Қазақстан «электрондық үкімет» деңгейі бойынша әлемде 24-орында, ал онлайн-қызметтердің сапасы бойынша 10-орында тұр.
Инвесторларға жағдай және қолдау
Бектеновтың айтуынша, ірі инвесторлар үшін заңнамалық тұрақтылықты 25 жылға кепілдендіретін инвестициялық келісімдер қарастырылған. Өткен жылы мұндай алты келісім жасалса, биыл олардың саны 21-ге жеткен.
Сондай-ақ ол ағылшын құқығының юрисдикциясы қолданылатын және «жасыл» әрі исламдық қаржы құралдары дамып келе жатқан «Астана» халықаралық қаржы орталығының рөлін атап өтті.
Ірі жобалар мен серіктестік мысалдары
Премьер шетелдік капитал қатысқан бірқатар жобаларды мысалға келтірді: Алматы облысындағы Fufeng Group агропаркі мен PepsiCo зауыты, Түркістандағы Lihua Group тоқыма кластері және KIA Qazaqstan автозауыты.
Бектенов үкіметтің инвесторларға жобаларды іске асырудың барлық кезеңінде жан-жақты қолдау көрсетуге дайын екенін айтты. Форум аясында «айтарлықтай көлемдегі коммерциялық келісімдер пакеті» қол қойылатынын да жеткізді.