2025 жылы Украинада 122 мың адам соғыстан қашып, өз үйлерін тастап кеткенін БҰҰ есептеп шығарды. Соғыс басталғалы бері украиналық босқындардың саны 10 миллионға жуықтады, деп хабарлайды Ulysmedia.kz.
ТОЛЫҒЫРАҚ
Үш жарым жылдан астам уақытқа созылып келе жатқан Украинадағы соғыс бұл елден босқындардың көбеюіне алып келді. Шамамен 10 миллион украин өз үйлерін тастап, қарулы қақтығыстан қашып, мәжбүрлі қоныс аударушыларға айналды немесе елден кетуге мәжбүр болды. Мұндай деректерді БҰҰ-ның гуманитарлық мәселелерді үйлестіру басқармасы жұма күні, 21 қарашада жариялады.
Тек биылғы жылы ғана зорлық-зомбылықтан 122 мың адам қашқанын дүниежүзілік ұйым атап өтті. Олардың басым бөлігі – майдан шебіне жақын аймақтардағы әйелдер, балалар және қарт адамдар. Соғыс басталғалы Украинада жүздеген мың әскери және бейбіт тұрғын қаза тапқан немесе жараланған.
ГУМАНИТАРЛЫҚ КӨМЕКСІЗ ҚАЛҒАН
БҰҰ үйлерін тастамағандардың ауыр жағдайын ерекше атап өтті. Донецк облысындағы Покровск және Мирноград қалаларында әлі күнге дейін шамамен 1500 адам бар, олардың көбі – қарттар мен мүмкіндігі шектеулі адамдар. Олар тұрақты түрде суға, электр энергиясына және медициналық қызметке қол жеткізе алмай отыр. OCHA деректеріне сәйкес, Лиман қаласында шамамен 3000 адам жалғасып жатқан шайқастарға байланысты гуманитарлық көмектен ажырап қалған.
Балалар ең осал топтардың бірі екені айтылды. Көптеген кәмелетке толмағандар бірнеше рет мәжбүрлі қоныс аударуға ұшыраған, ал кейбіреулері қақтығыс аймақтарының маңында өмір сүріп, өз көздерімен мектептердің, үйлердің және ауруханалардың қиратылғанын көрген.