Алматы облысы әкімінің орынбасары Қанат Есболатов Талғардағы жиында мүгедектігі бар адамдар туралы айтқан сөзі үшін көпшіліктен кешірім сұрады, деп хабарлайды Ulysmedia.kz.
ТОЛЫҒЫРАҚ
Оның сөзінше, денсаулық сақтау министрі Ақмарал Әлназаровмен Талғардағы кездесуге қалың жұрт жиналды. Әрқайсы өзекті мәселе көтеріп, сұрақ қоюға асықты. Сондықтан ұзын-сонар кезек болған.
Шенеунік регламент бойынша кездесуге екі сағат бөлінгенін, бірақ сұрақтардың көп болуына байланысты жиын шамамен 4 сағатқа созылғанын айтты.
– Келген азаматтардың арасында бірқатар мүгедектігі бар адам болды. Кейбірі тік тұрып, өз кезегін күтті. Кезегі жеткенде залдағы бірнеше адам сөзін бөліп, оған кедергі жасай бастады. Регламентті сақтауға шақырдым. Алайда орыс тілінде айтқан сөзімде қателік бар. Ойымды дұрыс жеткізбеппін. “Құдай үлкен сынақ берген” деп айтпақ болғанмын, – деп жазды ол әлеуметтік желідегі парақшасында.
Қанат Есболатов бұл сөзі үшін көпшіліктен кешірім сұрады.
– Айтқан сөзім көпшіліктің көңіліне, тіпті намысына тигенін де түсіндім. Осы үшін шын ниетіммен кешірім сұраймын. Ауқымды іс-шараларда алдымен егде жастағы тұрғындарға және мүмкіндігі шектеулі азаматтарға жол беру маңызды. Қай жиын болмасын, оларды көп күттірмей, кезексіз тыңдау – дұрыс әрі адамгершілікке сай деп есептеймін. Сіздердің пікірлеріңіз бен реакцияларыңыз мен үшін өте маңызды. Жиында көтерілген әр сұрақты әкімдік пен министрлік назарға алды, көпшілігіне сол жерде жауап берілді. Қосымша пысықтауды қажет ететін мәселелер хаттамаға енгізіліп, бақылауға алынды. Министрлікпен бірге бұл бағыттағы жұмысты жалғастырамыз. Белсенділік танытқандарыңыз үшін баршаңызға тағы да алғыс айтамын, – деп жазды ол.
БҰҒАН ДЕЙІН
Еске салайық, денсаулық сақтау министрі Ақмарал Әлназарованың Талғар ауданы мен Алматы облысының тұрғындарымен кездесуінде айтылған сөз қоғамда қызу талқыланып жатқанын жазғанбыз.
Кездесуде Алматы облысы әкімінің бір орынбасары былай деген: «Мүгедек адамдарға құрметпен қараңыздар, оларды Алланың өзі жазалап қойған».
Залдағы адамдардың айтуынша, біреулер айтылған сөздің мәнін бірден түсінбесе, енді бірі ашық наразылық білдірген. Видео әлеуметтік желіде тарағаннан кейін талқылау одан әрі өрши түсті.