Индонезия, Тайланд және Малайзия аумағында болған жойқын су тасқындары мен көшкіндер 500-ден астам адамның өмірін қиып, аймақта іздестіру-құтқару жұмыстары жалғасып жатыр, деп хабарлайды Ulysmedia.kz.The Guardian басылымына сілтеме жасап.
ИНДОНЕЗИЯДАҒЫ АХУАЛ
Ең ауыр жағдай Индонезияда тіркелді. Суматра аралында кемінде 350 адам қаза тауып, тағы 279 адам із-түзсіз жоғалғандар қатарында. Солтүстік Суматрада 166 адамның, Батыс Суматрада 90 адамның, ал Ачех провинциясында 47 адамның мерт болғаны расталды.
Құтқарушылар көптеген шалғай аймаққа жолдардың қирауына байланысты жете алмай отыр. 3,5 мыңнан астам полицей іздеу жұмыстарына және көмек таратуды ұйымдастыруға жұмылдырылған.
Шамамен 80 мың адам эвакуацияланған, ондаған мың адам уақытша баспаналарда, ал жүздеген тұрғын көмекке әлі де қол жеткізе алмай отыр.
ТАЙЛАНДТАҒЫ СУ ТАСҚЫНЫ
Тайландта су тасқыны 3,8 миллион адамға әсер етті. Елдің оңтүстігіндегі Сонгкхла провинциясында су деңгейі үш метрге дейін көтерілген, бұл – кейінгі он жылдағы ең ауыр апаттардың бірі. Елде кем дегенде 162 адам қаза тапты.
Хатъяй қаласында мәйітхана толып кеткендіктен, қаза тапқандардың денесін тоңазытқыш жүк көліктерінде сақтауға тура келген.
Тайланд премьер-министрі мұндай қиын жағдай кезінде жіберілген қателіктер үшін кешірім сұрап, зардап шеккен аудандарды тазарту кемінде екі аптаға созылатынын айтты. Қаза тапқандардың отбасына 2 млн батқа дейін өтемақы төленеді.
МАЛАЙЗИЯДАҒЫ ЖАҒДАЙ
Малайзияда 2 адамның қаза тапқаны хабарланды. Қатты жауған жаңбыр Перлис штатының солтүстігінде су басуға себеп болды. Эвакуациялау шаралары жалғасып жатыр.
КЛИМАТТЫҚ ФАКТОР
Сарапшылардың айтуынша, биылғы муссон маусымы климаттың өзгеруіне байланысты әдеттегіден әлдеқайда ауыр өтті. Дауылдар ұзаққа созылып, күшейгендіктен рекордтық жауын-шашын, жойқын тасқындар мен көшкіндерге алып келді.