«Такси жүргізушісі» ұғымын енгізу керек - депутат Бейсенбаев

ТАКСИ ЖҮРГІЗУШІЛЕРІНІҢ МӘСЕЛЕЛЕРІ

Елнұр Бейсенбаевтың айтуынша, елде жолаушыларды тасымалдау саласында 500 мыңнан астам такси жүргізушісі жұмыс істейді. Бірақ бұл ресми дерек емес, себебі сервистер нақты мәлімет бермейді. Депутат оларды «күнделікті өмірдің ажырамас бөлігіне айналды» деп атады.

— Бұл адамдардың тағдыры, олардың өмірі мен денсаулығын біз заң деңгейінде қорғауымыз керек, — деді ол.

Депутат заңдарда әлі күнге дейін кеңестік кезеңнен қалған ескі терминдер бар екенін, олардың қазіргі сервистердің жұмысын көрсетпейтінін айтты. Әрбір сапарда жолаушылар мен жүргізушілердің денсаулығы сақтандырылмаған.

— Шын мәнінде, олардың қызметі «сұр аймақта» қалып отыр. Құқықтық алаңнан тыс жауапкершілік, қауіпсіздік стандарттары, алгоритмдердің ашықтығы, сақтандыру және жолаушылар мен жүргізушілердің құқықтарын қорғау мәселелері шешілмей тұр, — деді депутат.

ӘЛЕУМЕТТІК ҚОРҒАНЫС ЖОҚ

Қазақстанда «такси жүргізушісі» деген нақты анықтама жоқ. Кімнің қандай жауапкершілігі бар екені, жүргізуші мен таксопарктің құқықтары мен міндеттері белгісіз. Соның салдарынан такси жүргізушілері әлеуметтік тұрғыда қорғалмаған күйде қалып отыр.

МЕДИЦИНАЛЫҚ ТЕКСЕРУДІҢ ФОРМАЛДЫҒЫ

Депутат күнделікті медициналық тексеруден өту талабы формалдыққа айналғанын және іс жүзінде орындалмайтынын атап өтті.

— Нәтижесінде тапсырысты орындауға жүргізуші куәлігі жоқ адамдар жіберілуі мүмкін. Ең қауіптісі – оң жақ рөлді көліктерде жоғары жылдамдықпен тас жолдарда жүру. Кейбір агрегаторлар сапардың нақты құнын көрсетпейді. Қолма-қолсыз төлем жасау мүмкіндігі жоқ. Кейбір қосымшаларда жедел қызметтерді шақыру жүйесі мен тәулік бойы клиентпен байланыс қолдауы қарастырылмаған, — деді Мәжіліс депутаты.

ДЕПУТАТ ҰСЫНҒАН ШАРАЛАР

Өз депутаттық сауалында Елнұр Бейсенбаев мынадай ұсыныстар жасады:

• Агрегаторларды әр сапарға жолаушылар мен жүргізушілердің өмірі мен денсаулығын сақтандыруға міндеттеу.
• «Такси жүргізушісі» ұғымын ресми түрде енгізіп, олардың мәртебесін, құқықтары мен міндеттерін бекіту. Жүргізушілерді тапсырысты жеке орындауға және ең төменгі санитарлық нормаларды сақтауға міндеттеу.
• Формалды күнделікті тексерулердің орнына тұрақты медициналық тексерулер жүргізу және бақылауды Денсаулық сақтау министрлігінің жүйелері арқылы автоматтандыру.
• Жолаушыларды сапардың нақты құны туралы хабардар ету, жылдамдық пен маршрутты бақылау, жүргізуші мен көлік деректерін мемлекеттік базалар арқылы тексеру.