Ақтөбе қаласындағы кәріз-тазарту құрылыстарын (КТҚ) қайта жаңғырту жұмыстары қытайлық компанияға сеніп тапсырылды, деп хабарлайды Ulysmedia.kz.
Келісімге қол қойылды
Желтоқсан айының соңында Ақтөбе қаласының әкімдігі қытайлық мердігермен ресми келісімшарт жасасты. Билік өкілдерінің айтуынша, жоба Еуропалық қайта құру және даму банкі (ЕҚДБ) қаржыландыруы есебінен жүзеге асады. Қаржы институты мердігерді таңдауға шамамен бір жыл уақыт жұмсаған.
Жобаның ауқымы қандай?
Ақтөбе облысының әкімі Асхат Шахаровтың айтуынша, байқау бір жылға созылып, дайындық жұмыстары одан да ертерек басталған.
- Байқау бір жылға жуық өтті, дайындық бұдан бұрын басталған. Мердігерлер кәріз-тазарту құрылыстарын қайта жаңғырту бойынша құрылыс-монтаж жұмыстарына кіріседі. Жобаны іске асыру шамамен 1,5 жылға созылады. Барлығы ойдағыдай жүзеге асса, тәулігіне 130 мың текше метрге дейін ағынды су өңделеді. Сонымен қатар, осы кезеңде қала бойынша герметикалығы бұзылған және тозығы жеткен құбырларды ауыстыруға қаржы қарастырдық, – деді облыс әкімі.
Жобаның құны
Диапазон басылымының дерегінше, 2024 жылы жобаның жалпы құны 53,5 млрд теңге деп бағаланған.
Жергілікті билік бұл жоба Ақтөбедегі коммуналдық инфрақұрылымның тозуын азайтып, экологиялық жағдайды жақсартуға мүмкіндік береді деп отыр.
Бұған дейін
Еске салайық, Атырауда бірқатар нысанды қайта жаңғырту жұмыстары жоспарланып отырғаны хабарланған болатын. Жоба бойынша мердігер ретінде Power China компаниясы тартылмақ.