Елордадағы сотта бір миллион долларға жуық қаржыға қатысты алаяқтық ісі бойынша Бекзат Кемелова жауап берді. Айыпталушы Салтанат Нүкенованың өліміне байланысты оқиғалар, Бишімбаевтар отбасымен арадағы қарым-қатынас және айыптау нұсқасы бойынша ішінде ақша болған көк чемодан туралы егжей-тегжейлі баяндады. Кемелова ешқандай ақша алмағанын қайталап отыр. Оның айтуынша, чемоданда тек жылжымайтын мүлікке қатысты құжаттар ғана болған. Ulysmedia.kz кезекті сот отырысында тағы не айтылғанын баяндайды.
Салтанатты өлтірген күн
Бекзат Кемелованың айтуынша, Салтанат Нүкенованың қаза тапқанын ол 2023 жылғы 9 қараша күні кешке қарай білген.
— Мен пойызда келе жатқанмын. Кешкі оннан кейін күйеуім Қайрат Кемелов қоңырау шалды. Ол: «Қуандық Салтанатты өлтірді», — деді.
Келесі күні, 10 қарашада, оған Қуандық Бишімбаевтың нағашы апасы Ғаухар Бишімбаева қоңырау шалып, не болып жатқанын сұраған.
— Мен ол кезде қалада емес екенімді айттым. Мұны тек Қайрат қана білуі мүмкін. Кейін келген соң күйеуіммен осы оқиға туралы сөйлестік. Оның Алматыда сарапшы болып жұмыс істегенін білетінмін. Ол ғылым кандидаты, бірақ бұл салада аз уақыт істеген. Уәлихан Бишімбаев білмедім деп айтқан. Бірақ бұл өтірік, Бишімбаевтар бәрін жақсы білді. Тіпті 2010 жылы күйеуім Астанада диссертация қорғағанда да олар хабардар болған. Біз оны Шымкентте атап өттік, сол жерде Уәлихан Бишімбаев та болды, — деді Кемелова.
Павлодарға сапар және қорқытулар
Кемелованың айтуынша, 11 қараша күні Бишімбаевтар отбасының мүшелері Павлодарға барған. Оның күйеуі Нүкеновтар жағындағы туыстармен хат жазысқан.
— Күйеуім Иманжүсіппен хат алмасып отырды (Павлодардағы құдалардың бірі, Қуандық Бишімбаев пен Салтанат Нүкенованың тойында болған). Оларға «мұнда сіздерді ешкім күтіп отырған жоқ, келсеңдер тірі кетпейсіңдер» деген хабарлама келді. Кейін Иманжүсіп Амангелдімен сөйлесіп, олар жастарды сабасына түсірді, — деді ол.
Бишімбаевтың анасына бару
2023 жылғы 13 қарашада, қылмыстан бірнеше күн өткен соң, Бекзат Кемелова Әлмира Нұрлыбековаға барған. Оның айтуынша, үйде Ғаухар Бишімбаева, Алима Нұрлыбекова және Уәлихан Бишімбаев болған.
— Барлығы сабырлы еді. Мен ұлыммен келдім, мектептен кейін кіріп шықтық.
Дәл сол кезде, Кемелованың сөзінше, оған ақша емес, құжаттар берілген. Әңгіме Қуандық Бишімбаев тұрған Тұран 5/6 мекенжайындағы коттедж бен біріктірілген екі пәтердің түпнұсқа құжаттары туралы болған.
— Нұрлыбековаға ақша керек екенін, сол үшін бәрін шұғыл заңдастыру қажет екенін айтты. Көршілердің қолын жинап, ПИК-тен рұқсат алу керек болды. Бұл қараша айы еді, мен ақша емес, құжаттарды алдым, — деді ол.
Чемодан қайдан пайда болды
Айыпталушының айтуынша, Нұрлыбекова құжаттарды сейфтен шығарған. Барлығы 16–17 құжат болған. Алдымен Кемелова кәдімгі матадан тігілген сөмке алған, бірақ үй иесі оған қарсы болған.
– Ол: “Сен не істеп тұрсың? Бұл коттедждің өзі 2,5 миллион доллар тұрады, екі пәтер — тағы шамамен бір миллион. Мұндай құжаттарды яндекс-таксимен сөмкеге салып алып кетпексің бе?” — деді. Ол сейфтен құжаттарды шығарды. Мен бөлмелерді араламадым, көбіне асүйде отырдым. Жатын бөлменің оң жағында қойма бар, сол жерде сейф тұр. Сол жерден 16–17 жылжымайтын мүлікке қатысты құжатты алып шықты.
Осыдан кейін, Кемелованың айтуынша, Нұрлыбекованың өтінішімен көк чемодан әкелінген.
— Чемодан Уәлихан Бишімбаевтың жатын бөлмесінің жанындағы қоймада тұрды. Біз құжаттарды соған салдық. Нақ сол құжаттарды, — деді ол.
Құжаттар 2017 жылы алынған және қайтарылмаған деген айыптауды Кемелова жоққа шығарды.
Сараптама мен «240 мың доллар» жайлы әңгімелер
Сотта Кемелова Салтанат Нүкенованың өлімінен кейін сараптамаға ықпал етуге тырысқан әрекеттер туралы да айтты. Оның сөзінше, 2023 жылғы желтоқсанда Альмира Нұрлыбекова алғашқы сот-медициналық сараптаманы оған беріп, бұрын сарапшы болған күйеуіне көрсетуді өтінген. Сонымен қатар «ерекше сараптама» жайы қозғалған.
— Адамның қай уақытта өлгенін дәл анықтайтын құрылғы бар деп айтылды. Ол үшін 240 мың доллар сұралған көрінеді.
Бұл ұсынысты ол күйеуіне жеткізген.
— Ол мұндай аппараттар жоқ екенін, бұл — алаяқтық екенін және алғашқы сараптаманың өзі объективті қорытынды бергенін айтты, — деді Кемелова.
Контекст
Бекзат Кемелова — Уәлихан Бишімбаевтың немере ағасының жұбайы. Іс Қылмыстық кодекстің 190-бабы — аса ірі көлемдегі алаяқтық бойынша қаралып жатыр. Тергеу нұсқасы бойынша, Әлмира Нұрлыбекова 990 мың долларды көк чемоданға салып, сақтауға Кемеловаға берген. Қорғау тарапы мұны жоққа шығарады. Бишімбаевтар отбасының өзге мүшелерінің айғақтары мен тараптардың адвокаттары туралы біз бұған дейін жазғанбыз. Еске салайық, 2024 жылғы 13 мамырда Астана соты бұрынғы Ұлттық экономика министрі Қуандық Бишімбаевты азаматтық жұбайы Салтанат Нүкенованы өлтіргені үшін 24 жылға бас бостандығынан айырған. Ол жазасын аса қатаң режимдегі мекемеде өтеп жатыр.