АҚШ Өкілдер палатасы Ресейге санкция салу туралы заң жобасын мақұлдады, деп хабарлайды Ulysmedia.
Толығырақ
АҚШ Өкілдер палатасы Украинаға көмек көрсету және Ресейге қарсы санкциялар енгізу туралы заң жобасын мақұлдады. Құжатта Украинаға әскери қолдау көрсету шаралары мен Ресейге қысымды күшейтуге бағытталған қосымша тетіктер қарастырылған.
Құжатты 226 конгрессмен қолдап, 195 депутат қарсы дауыс берген. Заң жобасын қолдағандардың қатарында 207 демократ, 18 республикашыл және бір тәуелсіз конгрессмен болды.
Алайда заң күшіне енуі үшін оны әлі Сенат мақұлдауы қажет. Одан кейін құжат президенттің қол қоюына жіберіледі.
Контекст
Сәуір айында ұсынылған заң жобасы Украинаны қалпына келтіруге арналған арнайы қор құруды көздейді. Сонымен қатар құжат АҚШ президентінің Украина мен Шығыс Еуропа елдеріне қорғаныс мақсатындағы әскери мүлікті несие немесе жалға беру тетіктері арқылы жеткізу жөніндегі өкілеттігін қайта жандандырады.
Құжатқа сәйкес, АҚШ Қорғаныс министрлігі 2027 жылдың соңына дейін Украинаға барлау саласында қолдау көрсету құқығына ие болады.
Ал АҚШ Мемлекеттік департаменті Балтық елдерінің қарулы күштері мен шекаралық құрылымдарының әлеуетін күшейтуге бағытталған шараларды кеңейтуге міндеттеледі.
Құжат сондай-ақ Ресейге қысым жасау тетіктерін кеңейтуді қарастырады. АҚШ президентіне қосымша санкциялар енгізу, ресейлік азаматтар мен ұйымдардың активтерін бұғаттау, сондай-ақ жаңа экспорттық шектеулер мен кедендік баждар белгілеу құқығы беріледі.
Бұл шаралар Мәскеудің соғыс жүргізуге арналған экономикалық мүмкіндіктерін одан әрі шектеуге бағытталған.
Сонымен қатар еуропалық серіктестермен ынтымақтастықты күшейту көзделген. Атап айтқанда, қару-жарақ жеткізу, украиналық әскери қызметкерлерді оқыту және барлау мәліметтерімен алмасуды үйлестіру бағыттары қамтылған.