Оралда құжаттары жалған сынақ хаттамасы негізінде рәсімделген мұздатылған ет өнімдері анықталды. Тексеру кезінде құжатта көрсетілген зертхана бұл өнімге ешқандай сынақ жүргізбегені және мұндай хаттама бермегені белгілі болды. Бұл туралы Техникалық реттеу және метрология комитеті мәлімдеді, деп хабарлайды Ulysmedia.kz.
Мән-жайы
Тексеру өнімді бақылау үшін сатып алғаннан кейін басталған.
Тауарға ЕАЭО талаптарына сәйкестік декларациясы болған. Құжатты Беларусьтегі сертификаттау органы тіркеген.
Құжаттарда жартылай фабрикаттар Алматыдағы аккредиттелген зертханада қажет сынақтан өтті деп көрсетілген.
Мамандар бұл мәліметті тексеру үшін зертханаға ресми сұрау жолдаған.
Зертхана өкілдері бұл өнімді зерттемегенін, ал құжатта көрсетілген сынақ хаттамасын рәсімдемегенін және бермегенін хабарлаған.
Декларацияның күші жойылды
Осылайша, сәйкестік декларациясы шындыққа жанаспайтын құжаттың негізінде тіркелгені анықталды.
Өнім қажет сынақтан өткені және ЕАЭО қауіпсіздік талаптарына сай екені іс жүзінде расталмаған.
Тексеруден кейін декларацияның Қазақстан аумағындағы күші жойылды.
Ақпарат уәкілетті және бақылаушы органдарға да жолданды.
Өндіруші сәйкестікті растау және бағалау тәртібін бұзғаны үшін әкімшілік жауапкершілікке тартылды.
Комитет өкілдері декларацияның тізілімде болуы тауардың барлық қажетті сынақтан шынымен өткеніне өздігінен кепілдік бермейтінін атап өтті.