Қазақстанның оңтүстігінде жарықтың жаппай өшуіне Орталық Азияның энергия жүйесі тарапынан электр энергиясы ағынының күрт өзгеруі себеп болған. Бұл туралы Энергетика министрлігі мәлімдеді, деп хабарлайды Ulysmedia.kz.
Толығырақ
Ведомствоның мәліметінше, 14 тамызда энергетикалық жүйеде қуат балансы бұзылған. Осыдан кейін апатқа қарсы автоматты қорғау жүйесі іске қосылып, бірнеше өңірдегі тұтынушылардың бір бөлігі электр энергиясынан ажыратылған.
– Қазіргі уақытта жүйелік оператор «KEGOC» АҚ қажетті қалпына келтіру жұмыстарын жүргізіп жатыр. Жағдай Энергетика министрлігінің бақылауында. Электрмен жабдықтауды қалпына келтіру барысы туралы толық ақпарат қосымша хабарланады, – деп атап өтті министрлік.
KEGOC не деді?
KEGOC мәліметінше, технологиялық ақау жергілікті уақыт бойынша сағат 14:37-де болған. 500 кВ кернеудегі үш электр беру желісі – «Ағадыр – Үлкен» Л-5300 және Л-5320, сондай-ақ «Ақтоғай – Талдықорған» Л-5400 желілері ажыратылған.
Осыдан кейін Қазақстанның Бірыңғай электр энергетикалық жүйесінің Оңтүстік аймағы Орталық Азияның Біртұтас энергетикалық жүйесімен бірге оқшауланған режимде жұмыс істеуге көшкен.
KEGOC-тың алдын ала мәліметінше, бұған Орталық Азияның энергия жүйесі тарапынан қуаттың күрт артуы себеп болған.
– Қалпына келтіру жұмыстары дереу басталды. Сағат 14:47-ге қарай Қарағанды, Абай және Ұлытау облыстарындағы 295 МВт көлеміндегі шектеулер алынып тасталды, – деп хабарлады компания.
Қай өңірлерде жарық өшті?
14 тамызда Алматы қаласында, Алматы облысында және Қазақстанның оңтүстігіндегі басқа да өңірлерде жарық жаппай өшті. Жетісу облысы мен Шымкент тұрғындарынан да жарықтың өшкені туралы шағымдар түсті.
Бұған дейін Алматы әкімдігі сағат 14:38-де KEGOC-тың үш жоғары кернеулі желісі – Л-5400, Л-5300 және Л-5320 апатты жағдайда ажыратылғанын хабарлаған. Осыдан кейін апатқа қарсы автоматика іске қосылған.
Алматы мен Алматы облысында ажыратылған жүктеме көлемі шамамен 300 МВт болды. Қалада электр энергиясының болмауына байланысты кейбір бағдаршамдар жұмыс істемей, көлік кептелісі пайда болды.
Орталық Азияның бірнеше елінде бір мезетте жарық өшті
Электр энергиясындағы ақаулар Орталық Азияның басқа елдерінде де шамамен сол уақытта тіркеле бастады.
Бішкекте сағат 15:00 шамасында қаланың әртүрлі аудандарының тұрғындары кернеудің секіруі мен жарықтың өшкеніне шағымданды. Қаланың кейбір бөліктерінде электрмен жабдықтау кейін қалпына келтірілді.
Душанбе мен Тәжікстанның басқа да аймақтарынан электр энергиясындағы іркілістер туралы хабарламалар түсті. Өзбекстанның Сурхандария және бірқатар басқа облыстарында да проблемалар тіркелді.
Орталық Азия елдерінің энергетикалық жүйелері өзара байланысты. Сондықтан жүйенің бір бөлігіндегі елеулі теңгерімсіздік немесе апат бірден бірнеше мемлекетке әсер етуі мүмкін.