«Ұмай» ипотекасы басталды: үй алғысы келетін әйелдер нені білгені жөн

Бағдарлама туралы

Бағдарлама бойынша өтініштер несие қаражатының түсуіне қарай қаралады, конкурстық іріктеу жүргізілмейді. Алғашқы транш көлемі – 9 млрд теңге.

Негізгі шарттары

• несие мөлшерлемесі — жылдық 14,8%;
• ЖТСМ — 16,3%-дан 16,8%-ға дейін;
• несие сомасы — 50 млн теңгеге дейін;
• бастапқы жарна — Астана мен Алматыда кемінде 20%, басқа өңірлерде кемінде 15%;
• отбасының орташа айлық таза табысы 1,25 млн теңгеден аспауға тиіс;
• төлем қабілетін растау үшін соңғы 6 айдағы ресми табыс қажет;
• өтініш берушінің басқа жылжымайтын мүлкінің болуы бағдарламаға қатысуға кедергі емес;
• баспананы Қазақстанның кез келген қаласынан сатып алуға болады, тіркеу мекенжайына байланысты шектеу жоқ. 

Қандай үй сатып алуға болады?

«Ұмай» арқылы:

• пайдалануға берілген бастапқы тұрғын үйді;
• құрылыс кезеңіндегі, ҚТК кепілдігі немесе сақтандыру тетігі бар тұрғын үйді;
• 2016 жылдан бері салынған екінші нарықтағы тұрғын үйді сатып алуға болады.

Бастапқы нарықтағы үйді Baspana Market арқылы таңдауға болады. 

30 млн теңгелік пәтерді алсақ, есеп қалай шығады?

Бағдарламаның жұмыс істеу логикасын түсіндіру үшін Алматыдағы 30 млн теңгелік пәтерді қарастырып көрелік.

Банк тұрғын үй құнының 80%-ын, яғни 24 млн теңгені несиеге береді. Қалған 6 млн теңге — бастапқы жарна ретінде сатушыға қарыз алушының өз қаражатынан төленеді.

Бұл жерде маңызды жайт бар: банк несие көлемін пәтердің сату бағасы мен бағалау құнының қайсысы төмен болса, сол сомаға сүйеніп есептейді. Мысалы, пәтер 32 млн теңгеге сатылып, бағалаушы оның құнын 30 млн теңге деп белгілесе, банк 30 млн теңгенің 80%-ын, яғни 24 млн теңгені ғана қаржыландырады. 

Ай сайынғы төлем қанша?

24 млн теңге несие алған жағдайда:

Депозитте жинақ болмаса:

• алғашқы 10 жылдағы ай сайынғы төлем — шамамен 387 200 теңге.

Депозитте 2,4 млн теңге жинақ болса:

• ай сайынғы төлем — шамамен 365 600 теңге.

Яғни депозиттегі жинақ 2,4 млн теңге болған жағдайда ай сайынғы төлем шамамен 21 600 теңгеге азаяды.

Бағдарлама логикасы бойынша, Отбасы банкіндегі тұрғын үй жинағы көбейген сайын ай сайынғы төлем де төмендейді. Ал алғашқы 10 жыл өткеннен кейін қарыз алушы тұрғын үй заемына ауысады, сол кезде мөлшерлеме мен ай сайынғы төлем төмендейді. Нақты мөлшерлеме депозит көрсеткіштеріне байланысты жеке есептеледі. 

«Ұмайды» кімдер пайдалана алады?

Бағдарлама Қазақстан Республикасында жұмыс істейтін әйелдерге бағытталған. Қатысу үшін тұрақты ресми табыс болуы керек. Отбасы жағдайы немесе әйелдің атында басқа баспананың болуы бағдарламаға қатысуға кедергі емес. 

Өтінімді Отбасы банкінің бөлімшесінде немесе қашықтан беруге болады. Онлайн өтініш беру үшін банктің бейнеқызметін және Baspana Market-тегі жеке кабинетті пайдалануға болады.