Түркістанда Арыста болған адам өліміне әкелген жол апатына қатысты сот аяқталуға жақын. Оқиға кезінде көлік үй ауласындағы орындықта отырған адамдарды қағып кеткен. Салдарынан жүкті әйел мен екі бала қаза тапты, деп хабарлайды Ulysmedia.kz.
Оқиғаның мән-жайы
«7 арнаның» мәліметінше, сот алдында мұғалім жауап беріп жатыр. Айыптау тарапының нұсқасы бойынша, жол апаты болған сәтте ол көлікті мас күйде басқарған.
Мемлекеттік айыптаушы сотталушыны 10 жылға бас бостандығынан айырып, өмір бойына көлік жүргізу құқығынан айыруды сұрады. Сонымен қатар, прокурор әйелдің 14 жасқа толмаған қызы бар екенін ескеріп, жазаны өтеуді бір жылға кейінге шегеруді ұсынды.
– Соттан түпкілікті 10 жылға бас бостандығынан айыру және өмір бойына көлік жүргізу құқығынан айыру жазасын тағайындауды сұраймын, – деді прокурор Ақжарқын Оразбай.
Қаза тапқандардың туыстары қатаң жаза сұрады
Сотта марқұмдардың туыстары айыпталушыны кешірмейтінін айтып, оған барынша қатаң жаза тағайындауды талап етті.
Жол апаты салдарынан үш адам қаза тапты. Тағы бір адам ауыр жарақат алды, ал екі адам орташа деңгейдегі жарақатпен ауруханаға жеткізілді.
«Мектепке емес, қызыма зиратқа барып жүрмін»
30 жастағы Дана Үсімбек пен оның бір жарым жастағы баласы ауыр жарақат алған. Ал бес жасар қызы оқиға орнында қаза тапқан.
– Біз өсіріп, тәрбиелеп отырған баламыздан айырылдық. Өзім мүгедек болып қалдым. Менің де, баламның да денсаулығы енді бұрынғыдай болмайды. Қызымды мектепке дайындап, құжат жинаудың орнына қазір зиратына барып, дұға оқып жүрмін, – деді ол сотта.
Мұғалім жасаған ісіне өкінетінін айтып, кешірім сұрады. Сондай-ақ, соттан мүгедектігі бар кәмелетке толмаған қызын тәрбиелеп отырғанын ескеруді өтінді.
Іс бойынша үкімді 7 қыркүйекте жариялау жоспарланып отыр.