2026-2027 оқу жылына Италия университеттеріне түскен қазақстандық студенттер құжат рәсімдеу кезінде жаңа талап пайда болғанына шағымданды. Олардың айтуынша, енді студенттік виза алу үшін CIMEA сертификаты, яғни шетелдік дипломдарды тексеретін құжат сұралуы мүмкін. Бұл талап білім туралы құжаттың құндылығы жөніндегі декларацияны (Dichiarazione di Valore) алып қойған немесе соған құжат тапсырған талапкерлерге де қатысты болуы ықтимал, деп хабарлайды Ulysmedia.kz.
Студенттердің айтуынша, CIMEA туралы ақпарат 11 қыркүйекте ғана шыққан. Бұл кезде талапкерлердің көбі оқуға түсу рәсімінің негізгі кезеңдерінен өтіп қойған.
Олар бірнеше ай бойы университеттен қабылдау хатын алып, Universitaly жүйесіндегі рәсімдерді аяқтап, құжаттарын аудартып, апостиль қойдырып, тиісті төлемдерді төлеп, бұған дейін шетелдік дипломды растаудың бір жолы ретінде қабылданып келген DDV құжатын рәсімдеген.
Енді соңғы кезеңге келгенде оларға CIMEA сертификаты да қажет болуы мүмкін екені айтылған.
«Оқу визасына құжат қабылдау мерзімі аяқталғанша бұл құжатты алып үлгеруіміз мүмкін емес», - деп жазды студенттер.
Басты мәселе - уақыттың тығыздығы.
CIMEA сертификатын рәсімдеу 60 жұмыс күніне дейін созылуы мүмкін, ал студенттік визаға құжат 30 қарашаға дейін ғана қабылданады.
Сонымен қатар, талапкерлер CIMEA платформасында техникалық ақаулар барын айтады. Атап айтқанда, төлем жасау және өтінім рәсімін бастау кезінде қиындықтар туындап отырған көрінеді.
Сондықтан құжат тапсыруға бірден дайын тұрған студенттердің өзі сертификатты уақытында алып үлгеретініне сенімді емес.
Студенттердің бірі Италияға оқуға түсуге бір жылға жуық уақыт дайындалғанын және енді ең соңғы кезеңде университеттегі орнынан айырылып қалу қаупі туындағанын айтты.
«Студент бір жыл бойы дайындалып, университетке қабылданып, Universitaly жүйесінен өтіп, құжаттарды аударуға, апостильге, DDV рәсімдеуге, баспанаға ақша жұмсауы мүмкін. Ал ең соңғы қадамда бұрын айтылмаған жаңа талап шығып, соның кесірінен визаны уақытында ала алмай қалуы ықтимал», - деп жазды ол.
Оның айтуынша, көптеген студент құжат рәсімдеуге және оқуға дайындыққа қомақты қаржы жұмсап қойған.
Өтініш авторлары өздеріне ерекше жағдай жасауды сұрамайтынын айтады.
Олардың талабы - құжат рәсімдеуді бұрынғы тәртіппен бастап қойғандар үшін DDV жарамды болып қала берсе, ал CIMEA міндетті талапқа айналатын болса, оны келесі оқу жылынан бастап енгізу.
«Біз жағдай қайта қаралып, құжат рәсімдеуді бұрынғы талап бойынша бастап қойған студенттер үшін өтпелі шешім табылады деп үміттенеміз», - деп жазды талапкерлердің бірі.
CIMEA - Италияның академиялық ұтқырлық пен білім құжаттарының сәйкестігі жөніндегі ұлттық ақпараттық орталығы.
Орталық шетелдік дипломдарды тексерумен, олардың түпнұсқалығын растаумен және Италияның білім беру жүйесіне қаншалық сәйкес келетінін анықтаумен айналысады.