Алматыда көлік көп жүретін көшелерде автотұрақтың бір сағаты қазіргі 100 теңгенің орнына 200 теңге болады, деп хабарлайды Ulysmedia.kz.
Толығырақ
Алматыдағы коммуналдық автотұрақтардың тарифін 2016 жылдан бері алғаш рет қайта қарау ұсынылды. Қазір тұрақтың бір сағаты 100 теңге тұрады және бұл баға 10 жылдан бері өзгермеген. Жаңа жоба қалалық мәслихат сессиясында таныстырылды.
Баға қалай өзгереді
Автотұрақ құны жол учаскесінің жүктемесіне байланысты белгіленеді. Көлік қозғалысы аз көшелерде тариф бұрынғыдай сағатына 100 теңге болып қалады. Орташа жүктемедегі учаскелерде бағаны 150 теңгеге дейін, ал ең көп жүктемедегі көшелерде 200 теңгеге дейін көтеру ұсынылып отыр.
Жоба авторларының пікірінше, сараланған тариф бос орын іздеуге кететін уақытты қысқартып, автотұрақтардың айналымын арттыруға мүмкіндік береді, яғни сұраныс неғұрлым жоғары болса, тұрақ ақысы да соғұрлым қымбат болады. Бұл жүргізушілерді қоғамдық көлікке ауысуға немесе басқа балама іздеуге ынталандыруға тиіс.
Жеңілдіктер сақталады
Ақылы автотұрақ аймағында тұратын тұрғындар үйінің маңына көлігін тегін қою үшін арнайы рұқсат рәсімдей алады. Жекелеген санаттағы азаматтарға берілетін жеңілдіктер де сақталады.
Бұған дейін әкімдік тұрғындарға үйінен 500 метр радиуста көлігін тегін қоюға мүмкіндік беруді, сондай-ақ ардагерлерге, мүгедектігі бар адамдарға, көпбалалы аналарға және электромобиль иелеріне жеңілдік беруді ұсынған.