Алматының Түрксіб ауданында Владимир Лениннің ескерткіші алынып тасталды. Кеңес дәуірінен қалған монументтің орнына балалар алаңын салу жоспарланған, деп хабарлайды Ulysmedia.kz.
Мән-жай
Кеңес көсемінің ескерткіші Сейфуллин даңғылы мен Шолохов көшесінің қиылысындағы саябақта тұрған. Тамыз айының ортасында нысан баннерлермен қоршалып, онда тұрғындарға болашақ балалар алаңының жобасы таныстырылды. Кейін монумент орнынан жоғалып кеткен. Қазір бұл жерде құрылыс техникасы жұмыс істеп жатыр.
Ленин ескерткішінің жоғалуы әлеуметтік желілерде қызу талқыланды. Кейбір тұрғындар тоталитарлық дәуірді еске салатын ескерткіштің алынуын қолдаса, енді біреулері құрылысшылардың әрекетін сынға алды.
Ulysmedia.kz редакциясының сауалына Алматы әкімдігі ескерткіштің жөндеу жұмыстары жүргізіліп жатқан кезде уақытша алынғанын хабарлады. Кейін ол орнына қайта қойылады.
Контекст
Кеңес дәуірінің символы Қазақстан тәуелсіздік алғаннан кейінгі 35 жыл бойы қаланың шетіндегі осы жерде тұрды. Бұған дейін монумент Алматының орталығында орналасқан. Алайда 1990 жылдары ол Түрксіб ауданындағы саябаққа көшірілген.