Ресей бас прокурорының орынбасары қазақстандық кәсіпкер Тимур Турлов пен онымен байланысты бірқатар компанияға қатысты сот ісін бастады. РБК мәліметінше, тиісті талап-арыз Мәскеудің Тверь аудандық сотында тіркелген, деп хабарлайды Ulysmedia.kz.
Толығырақ
Басылымның хабарлауынша, іс бойынша жауапкерлер қатарында Freedom Holding негізін қалаушының өзінен бөлек, «Фридом Холдинг Корп.», «Фридом Финанс Европа Лтд.», «В-Эмпирикал Холдинг Корп.» компаниялары, сондай-ақ БАҚ холдинг қызметімен және Тимур Турловпен серіктестік қатынаста болған деп байланыстыратын Аркадий Щукин бар.
Айта кетейік, талап-арыз Тимур Турловтың FIDE президенті болып сайланғанынан бірнеше күн өткен соң беріліп отыр. 26 қыркүйекте, яғни бірнеше күн бұрын, Тимур Турлов Халықаралық шахмат федерациясының (FIDE) президенті болып сайланып, бұл қызметте Аркадий Дворковичті алмастырған еді.
Айта кетейік, кәсіпкер Ресей нарығымен байланысын біржола үзген. 2022 жылы Турлов Ресей азаматтығынан ресми түрде бас тартты, ал бір жылдан кейін Ресейдегі барлық активін сатуды аяқтады.
Компанияның ұстанымы
Freedom Holding баспасөз қызметі компания заңгерлері қазіргі уақытта қадағалау органының талаптарының мән-жайын зерттеп жатқанын мәлімдеді.
– Біз әзірше бұл талап-арыздың мәніне және оның дұрыстығына қатысты түсініксіз жағдайда отырмыз. Бұл мәселені зерттейміз. Холдингтің қызметіне елеулі қауіп төніп тұрғанын көріп отырған жоқпыз. Ресейде біздің активтеріміз жоқ, холдингтің өзі Ресей аумағында қызмет жүргізбейді, – деп хабарлады компанияның баспасөз қызметі РБК-ға.
Контекст
Тимур Турлов – Freedom Holding Corp. компаниясының негізін қалаушы әрі негізгі акционері. Forbes Kazakhstan мәліметінше, 2026 жылғы мамырдағы бағалау бойынша оның байлығы 5,2 млрд долларға жетеді.
Қаржы саласындағы бизнесінен бөлек, Турлов Қазақстандағы медиаактивтерді де белсенді түрде сатып алып жүр. Оның Turlov Private Holding компаниясы арқылы «Капитал» баспа үйі, «Радио Дача», Love Radio, «Той Думан» телерадиокомпаниясы және бірқатар басқа медиа компанияларына иелік етеді.