Украина президенті Владимир Зеленский Дональд Трамп «энергетикалық бітім» туралы мәлімдегеннен кейін Ресей әскері елдің энергетика және мұнай-газ инфрақұрылымына 76 рет соққы жасағанын хабарлады. Оның айтуынша, кейінгі бір аптада Ресей Украинаға қарсы мыңдаған дрон мен авиациялық бомба қолданған, деп хабарлайды Ulysmedia.kz.
18 қазанда Украина президенті Ресейдің кейінгі шабуылдары туралы мәлімет жариялады. Оның айтуынша, 11 қазанда АҚШ президенті Дональд Трамп «энергетикалық бітім» туралы мәлімдегеніне қарамастан, Ресей Украина аумағына соққы жасауды тоқтатпаған.
Зеленскийдің сөзінше, Ресей әскері ең алдымен халықты электр жарығымен және басқа да энергия ресурстарымен қамтамасыз ететін нысандарды нысанаға алған.
Украина президентінің мәліметінше, 18 қазанға қараған түні Ресей әскері елдің бірден төрт облысындағы электр қосалқы станцияларына шабуыл жасаған. Атап айтқанда, Винница, Житомир, Хмельницкий және Одесса облыстарындағы энергетикалық нысандарға соққы жасалған.
Салдарынан энергетикалық инфрақұрылым зақымданып, ондаған мың отбасы жарықсыз қалған.
Зеленский энергетика компанияларының мамандары мен апаттық-қалпына келтіру бригадалары шабуыл салдарын жою үшін тәулік бойы дерлік жұмыс істеп жатқанын айтты.
Ол энергетикалық нысандарға шабуылды тоқтату мүмкіндігі туралы ашық мәлімдемелер жасалғанына қарамастан, Ресей соққыларының әлі жалғасып жатқанын атап өтті.
Украина президенті келтірген мәліметке сәйкес, кейінгі жеті күнде Ресей әскері Украинаға қарсы 2700-ге жуық соққы беретін дрон, шамамен 1700 басқарылатын авиациялық бомба және 66 зымыран қолданған. Оның айтуынша, зымырандардың едәуір бөлігі баллистикалық болған.
Зеленский Ресей Украинада электр қуатын жаппай өшіруге әкелетін жағдай туғызуды көздеп отыр деп есептейді.
Сондай-ақ, ол АҚШ-ты Мәскеуге қарсы санкцияларды жеңілдету және жаңа келісімдер жасасу мәселесін талқылағанда Ресейдің шабуылдары әлі жалғасып жатқанын ескеруге шақырды.
Украина президентінің пікірінше, Ресей басшылығы экономикалық келісімдер жасау мүмкіндігін соғысты жалғастырса да, жаңа пайда көруге болады деген белгі ретінде қабылдап отыр.
Зеленский бейбітшілікке қол жеткізу үшін Ресейге қысымды күшейту қажет екенін мәлімдеді.
Дональд Трамп 11 қазанда Ресей мен Украина арасында «энергетикалық бітім» жасалғанын мәлімдеген болатын.
АҚШ президентінің айтуынша, екі ел бір-бірінің энергетикалық инфрақұрылымына соққы жасауды тоқтатуға келіскен. Алайда ол ықтимал келісімнің нақты шарттарын жарияламады.
Журналистер тараптардың шынымен келісім берген-бермегенін сұрағанда, Трамп мұны өзі жариялағандықтан, екі ел де келіскенін айтқан.
Кейін Владимир Зеленский мұндай бітім туралы алғаш рет АҚШ президентінің әлеуметтік желідегі жазбасынан білгенін хабарлады.
Трамптың мәлімдемесінен кейін Украина тарапы Ресейдің мұнай өңдеу зауыттарына жаңадан шабуыл жасағанын растаған жоқ.
Ал Мәскеу Украинадағы энергетикалық нысандарға соққы жасауды жалғастырды. Ресей тарапы мұны бітімнің нақты шарттары жөнінде келісім болмағанымен түсіндірді.
15 қазанда Financial Times басылымына берген сұхбатында Зеленский Украина Ресейдің мұнай өңдеу зауыттарына шабуылдарды қайта бастауы мүмкін екенін ескертті.
Ол мұндай қадамға Ресейдің Украина энергетикасына соққы жасауды тоқтатпауы себеп болуы мүмкін екенін айтты.
Айта кетейік, Ресейдің 76 рет соққы жасағаны және қолданылған қару-жарақ саны туралы деректер Украина президенті жариялаған мәліметтерге негізделген және Киевтің ресми ұстанымын білдіреді.