Павлодарда шала туған нәрестенің туыстары перинаталдық орталықта жатқан сәбидің аяғы сынғанын мәлімдеді. Отбасының айтуынша, ата-анасы бірнеше күн бойы баланың аяғындағы өзгерістерді байқап, дәрігерлерден себебін сұраған. Алайда нақты жауап ала алмаған. Бұл жағдайға облыстық денсаулық сақтау басқармасы пікір білдірді, деп хабарлайды Ulysmedia.kz.
Ұл бала 2026 жылғы тамызда салмағы небәрі 600 грамм болып, мерзімінен бұрын дүниеге келген. Содан бері ол Павлодар облыстық №1 перинаталдық орталығында дәрігерлердің бақылауында жатыр.
24 қазанға қарай нәрестенің салмағы 2020 грамға жеткен.
Баланың туыстарының бірінің айтуынша, 20–23 қазан аралығында ата-анасы ұлының бір аяғының түсі өзгеріп, ісінгенін байқаған.
Олар бұл жағдайды дәрігерлерге бірнеше рет айтқан. Алайда туыстарының сөзінше, медицина қызметкерлері тиісті көңіл бөлмеген.
23 қазанда дәрігерлер ата-анасына баланың ортан жілік сүйегі сынғанын хабарлаған.
Туысының айтуынша, медицина қызметкерлері нәресте құрысу кезінде өздігінен жарақат алуы мүмкін екенін түсіндірген. Алайда мұндай жауап отбасының күмәнін туғызған.
– Сонда бұл қалай мүмкін болғаны? Медицина қызметкерлері ешқандай пікір білдірмей отыр, – делінген туысының жазбасында.
Әлеуметтік желіде жазба тарағаннан кейін Павлодар облысының денсаулық сақтау басқармасы жағдайға қатысты пікір білдірді.
Басқарма өкілдерінің айтуынша, салмағы аз болып туған нәрестелердің сүйектері аса нәзік әрі сынғыш келеді.
Мұндай балаларда кездесетін асқынулардың бірі – шала туған нәрестелер остеопениясы. Бұл кезде сүйек тініне минералдар жеткілікті мөлшерде жиналмайды.
Ведомство мәліметінше, мұндай асқыну жағдайлардың 30–55 пайызында кездеседі. Соның салдарынан нәресте аяқ-қолын қалыпты қозғағанның өзінде сүйегі сынуы мүмкін.
Дегенмен басқарма дәл осы баланың сүйегі остеопения салдарынан сынғанын нақты растаған жоқ.
Ведомство перинаталдық орталық әкімшілігі ата-анасына нәрестенің денсаулығы туралы үнемі ақпарат беріп отыратынын да мәлімдеді.
Ал емдеу барысына қатысты толық мәлімет дәрігерлік құпия болғандықтан жарияланбайды.
Денсаулық сақтау басқармасының мәліметінше, қазір баланың жағдайы тұрақты.
Нәрестенің денсаулығын перинаталдық орталық дәрігерлері облыстық балалар ауруханасының травматологымен бірлесіп бақылап отыр.
Рентген нәтижесі сынған сүйектің орнында бастапқы сүйек бітігі қалыптаса бастағанын көрсеткен. Бұл сүйектің біту кезеңіне өткенін және сынған жерінің тұрақтана бастағанын білдіреді.
Ведомствоның хабарлауынша, қазір бұл жарақатқа байланысты арнайы ем жүргізу қажет емес.