Келесі жылы 4 300 қазақстандық Сауд Арабиясына қажылыққа бара алады. Қазақстанға алдағы қажылық маусымына осындай квота бөлінді, деп хабарлайды Ulysmedia.kz.
Мән-жай
Қазақстан мұсылмандары діни басқармасының мәліметінше, Бас мүфти Наурызбай қажы Тағанұлы мен Сауд Арабиясының Қажылық және ұмра министрі Тауфик бен Фаузан әр-Рабиа тиісті келісімге қол қойған.
Құжатта қажылық сапарын ұйымдастыру тәртібі белгіленген. Тараптар қажылардың тұратын жері мен тасымалына, медициналық талаптар мен қауіпсіздік шараларының сақталуына қатысты келісімге келген.
– Қазақстанға 2027 жылғы қажылық маусымына 4 300 орын бөлінді, – деп хабарлады ҚМДБ.
Контекст
Қажылық – мұсылмандардың Сауд Арабиясындағы қасиетті Мекке қаласына жасайтын сапары. Ол – ислам дінінің бес парызының бірі. Дене күші мен қаржылық мүмкіндігі бар әрбір мұсылман өмірінде кемінде бір рет қажылыққа баруға тиіс. Қажылық жыл сайын ислам күнтізбесіндегі белгіленген күндері өтеді.