14 қарашада Қазақстанның 10 қаласында қолайсыз метеорологиялық жағдай қалыптасады. Соның салдарынан ауадағы зиянды заттар ұзақ уақыт бойы тарамай, жиналып қалуы мүмкін, деп хабарлайды Ulysmedia.kz.
«Қазгидромет» мәліметінше, Павлодар, Қарағанды, Жезқазған, Балқаш, Теміртау, Шымкент, Түркістан, Талдықорған, Алматы және Астана қалаларында қолайсыз метеорологиялық жағдайға байланысты ескерту жарияланды.
Қолайсыз метеорологиялық жағдай желдің болмауы немесе баяу соғуы, тұман түсуі және температуралық инверсия сияқты құбылыстар қатар байқалғанда қалыптасады.
Мұндай кезде ауадағы зиянды заттар жан-жаққа тарамай, жер бетіне жақын қабатта жиналады. Соның салдарынан қаладағы ауа сапасы уақытша нашарлауы мүмкін.
Әсіресе өкпе, жүрек және қан тамырларының созылмалы аурулары бар адамдар мен аллергияға бейім тұрғындарға сақ болған жөн.
Мамандар оларға мүмкіндігінше далада ұзақ жүрмеуге және қажет дәрі-дәрмектерін өзімен бірге алып жүруге кеңес береді.