Қазақстанда ата-аналардың әлеуметтік желідегі наразылығынан кейін балалар арбасымен автобусқа міну ережелері қайта қаралатын болды. Премьер-министрдің орынбасары – көлік министрі Әсел Жанасова кішкентай баласымен жүрген ата-аналарды арбасын жинауға мәжбүрлеуге немесе қоғамдық көліктен түсіруге болмайтынын айтты, деп хабарлайды Ulysmedia.kz.
Әсел Жанасова балалар арбасымен жолаушыға лық толы автобусқа мінуге тыйым салынуы мүмкін деген ақпаратқа қатысты пікір білдірді. Жаңа ережелер төңірегіндегі талқылау ата-аналардың алаңдаушылығын туғызған еді.
Министрдің айтуынша, қоғамдық көлік баршаға, соның ішінде кішкентай баласы бар отбасыларға да қолайлы әрі қолжетімді болуы керек.
«Көлік министрі ретінде қоғамдық көліктің балалы отбасыларға ыңғайлы әрі қолжетімді болуы мен үшін аса маңызды. Ата-аналардан келіп түскен өтініштер мен сауалдарды ескере отырып, тиісті ережелерді қайта қарауға шешім қабылдадым. Бұл талаптардың әртүрлі түсіндірілуіне жол бермей, жолаушылардың жайлылығы мен қауіпсіздігін қамтамасыз етуге мүмкіндік береді», – деді Әсел Жанасова.
Еске салайық, бұған дейін әлеуметтік желіде балалар арбасымен жүрген аналарға лық толы автобустарға мінуге тыйым салынады деген ақпарат тараған болатын.
Бұл хабар қазақстандық аналардың наразылығын туғызып, олар кішкентай баламен қоғамдық көлікте жүрудің қиындықтарын айта бастады.
Неге бала арбасымен автобусқа мінуге болмайды? Неге біздің елде балалы аналарды осылай кемсітеді?» – деп ашуланды ол.
Камиланың айтуынша, таксимен жүру қымбатқа түседі. Әсіресе кішкентай баламен, оның арбасын қоса алып жүру оңай емес. Оның үстіне мұндай тапсырысты кез келген такси жүргізушісі қабылдай бермейді.
«Неге баласын арбаға салып жүрген ана міндетті түрде таксиге мініп, артық ақша жұмсауы керек? Таксидің қанша тұратынын білесіздер ме өзі?» – деді Камила.
Осыдан кейін Көлік министрлігі балалар арбасымен автобусқа мінуге толық тыйым салынады деген ақпаратты жоққа шығарған еді.
Ведомствоның түсіндіруінше, автобус жолаушыға лық толған жағдайда, ата-анаға орын болса, балалар арбасын жинап алып жүру қарастырылған.
Алайда арбаны жинау қолайсыз болса, ата-ана оны сол күйінде қалдырып, сапарын жалғастыра алады.
Бұл үшін айыппұл салынбайды, жолаушыны автобустан күштеп түсіруге немесе өзге де жаза қолдануға болмайды.