Жаңаөзен қаласына барған «ҚазМұнайГаз» ҰК АҚ жұмыс тобы «Өзенмұнайгаз» АҚ қызметін тексерудің кейбір нәтижелері туралы баяндады. Бұл туралы Ulysmedia.kz хабарлайды.
Мамандар бір типті су жылыту қондырғыларын қайта құру кезіндегі жұмыс құнының арасындағы айтарлықтай айырмашылықты тапты.
Анықталғандай, 3 су жылыту қондырғысын (ВГУ-1 НГДУ-3) қайта құрудың жалпы құны ҚҚС есебімен 525 миллион 482 мың теңгені құраса, бір ғана қондырғыны (ВГУ-3а-С НГДУ-1) қайта жөндеуге кеткен шығын ҚҚС қосқанда 380 млн теңгеден асқан.
"Сол сияқты, НГДУ-3 қондырғысын қайта құрудан 2 еседен астам қымбатқа түседі. Мұндай күрделі айырмашылықтың себебін мамандар зерттеп жатыр", - делінген "ҚазМұнайГаз" хабарламасында.
Сонымен қатар, ҚМГ 2022 жылы «ӨзенМұнайГаз» және «БерӘлі Маңғыстау компаниясы» ЖШС жалпы сомасы 2 млрд 582 млн 699 мың теңгеге ұңғымаларды жерасты жөндеуге келісім-шартқа қол қойғанын, жалпы жұмыс көлемі – 371 ұңғыманы (немесе 30 040,7 сағат) жерасты жөндеу жұмыстарын жүргізгенін хабарлады.
«ӨзенМұнайГаз» КМК Бюджет кодексін бұза отырып, жалпы сомасы 26 млн 951 мың теңгеге 300 сағатқа артық жұмыс уақытының нормасымен орындалған жұмыс актілерін қабылдаған. Сонымен қатар, аяқталмаған жұмыс көлемдері белгілі болды. Себептері анықталуда.
Жұмыс тобы 2022 жылдың желтоқсанынан 2023 жылдың қаңтарына дейін және 2023 жылдың наурызынан қазіргі уақытқа дейін ӨМГ «Самұрық-Қазына» ҰӘҚ» АҚ Сатып алу процедурасының нормаларын қолданбай, АИ-95 бензинін жүргізушілердің жалақы карталарына ақша аудару арқылы сатып алатынын анықтады.
Сондай-ақ ағымдағы жылдың қаңтар айында ӨМГ Сатып алу тәртібін бұза отырып, күнделікті және (немесе) апта сайынғы қажетті тауарларды, жұмыстарды, көрсетілетін қызметтерді сатып алу үшін бекітілген тізімсіз 69 тонна көлемінде АИ-95 бензині сатып алынған.
Еске салайық, 10 сәуірде Астанадағы Энергетика министрлігі ғимаратының жанына «Берәлі Маңғыстау компаниясы» мұнай кәсіпшілігіне қызмет көрсететін мердігер компанияның 70-ке жуық бұрынғы жұмысшысы жиналды. Бұған дейін «Берәлі Маңғыстау» серіктестігі тендерде жеңіліп, жұмысшылардың барлығы жұмыссыз қалған болатын.
Сәуірдің 11-і күні Астанадағы Энергетика министрлігі ғимаратының жанында пикетке шыққан жаңаөзендік мұнайшыларды тәртіп сақшылары ұстады.
Жалпы, полицейлер Астанада жаңаөзендік 126 жұмысшыны ұстады.
Сәуірдің 19-ы күні «Қазмұнайгаз» басшысы жаңаөзендік жұмысшылардың ереуіліне қатысты пікір білдіріп, «қорқатын ештеңесі жоқ» деген.