Алматы мемлекеттік активтер басқармасы мемлекеттік сатып алу сайтында "Көктөбе" телевизиялық және радиохабар мұнарасын сәулеттік-көркемдік жарықтандыру жұмыстарына тапсырыс беруге арналған лот жариялады, деп хабарлайды Ulysmedia.kz.
Басқарма тапсырыс берілген жұмыстарды 1,2 млрд теңгеге бағалаған.
Жобаның сипаттамасында жабдық әртүрлі мемлекеттік мерекелер мен маңызды мәдени оқиғаларға орай мерекелік жарық шоуларын өткізуге мүмкіндік беретіні айтылған.
"Архитектуралық-көркемдік жарықтандырудың ең жаңа жүйесі, Мәскеудегі Останкино телемұнарасының аналогы", - делінген сипаттамада.
Жарықтандыру үш режимде жұмыс істейтіні көрсетілген: түнгі, еркін және мерекелік. Сонымен қатар ол түсін өзгертеді, суреттер мен жарқылдарды көрсетеді.
Байқау талқылау сатысында.
Айта кетейік, бұдан бұрын Алматы мектептерінің бірі "эстетикалық безендіруге" 28 млн теңге жұмсағалы отырғаны хабарланған.