Германия канцлері Олаф Шольц бүгін Астанаға ресми сапармен келді, деп хабарлайды Ulysmedia.kz.
Қазақстан президенті Қасым-Жомарт Тоқаев Астанада Германия канцлері Олаф Шольцті күтіп алды. Екі елдің әнұраны орындалды.
Осыдан кейін Қасым-Жомарт Тоқаев пен Олаф Шольц кілемше бойымен Қазақстан Республикасының Мемлекеттік Туына қарай жүрді. Оның алдына келгенде мейман тоқтап, басын сәл иіп, өзінің құрметін білдірді. Екі елдің басшысы осыдан кейін келіссөз жүргізуге кіріп кетті.
ШАРЛАПАЕВ НЕ ДЕЙДІ
Шольц Ақордаға кірер алдында журналистер Өнеркәсіп және құрылыс министрі Қанат Шарлапаевтан Қазақстан мен Германияның өзара қарым-қатынасы қалай өрбитінін сұрап көрген. Бүгінгі таңда республикада неміс капиталының қатысуымен жалпы сомасы 1 млрд еуроға жуық 21 жоба іске асырылған. Олардың ішінде құрылыс материалдары мен арматура өндірісі бар.
– Біз неміс компанияларымен өте ұзақ және жақын қарым-қатынастамыз. Олар Қазақстанда ұзақ уақыт жұмыс істейді. Қазіргі уақытта іске асыру сатысында тұрған беске жуық жаңа жоба пысықталып жатыр, — деп атап өтті өнеркәсіп және құрылыс министрі Қанат Шарлапаев.
ӘЛЕУЕТІ МОЛ БАҒЫТ
Әлеуеті мол бағыттардың бірі – ауыл шаруашылығы техникасының өндірісі. Комбайн, тракторларымен танымал немістің CLAAS концерні Петропавлда техника құрастыруды іске қосқан. Шарлапаев Қазақстанның озық техникаға мұқтаж екенін және бүгінгі таңда CLAAS XERION тракторын қоса алғанда, ең жаңа модельдерді жеткізетінін атап өтті. Министрдің айтуынша, комбайндар мен тракторлар өндірісін кеңейту туралы келіссөздер жүргізіліп жатыр.
Министрдің айтуынша, Германиядан импорт азайған. Импорт көлеміне Қазақстанның ауыл шаруашылығы техникасын өзі өндіре бастағаны әсер етеді.
Неміс деректері бойынша, 2023 жылдың 10 айында тауар айналымы өткен жылдың сәйкес кезеңімен салыстырғанда 4,7%-дан 7,85% – 7,48 млрд еуроға дейін төмендеген. Бұл ретте Қазақстанға Германиядан импорт 32% (2,1 млрд-тан 2,77 млрд еуроға дейін), ал Германияға экспорт 18,1% (5,75 млрд-тан 4,7 млрд еуроға дейін) азайған.
ГФР сауда серіктестерінің рейтингінде 2022 жылдың қорытындысы бойынша Қазақстан 53 (2021) орыннан 43 орынға көтерілді. Германияның Орталық Азия өңіріндегі негізгі серіктесі Қазақстан: 2022 жылы екіжақты сауданың жалпы көлемі ГФР-ның өңір елдерімен сыртқы сауда операцияларының жалпы көлемінің 82,5% құрады.