LRT келесі жылдың соңына дейін іске қосылады. Астана әкімі Жеңіс Қасымбек осындай уәде берді, деп хабарлайды Ulysmedia.kz.
Әкімнің сөзінше, өткен жылы жер үсті метрополитенін салудың жаңа кезеңі басталған.
"Былтыр үкімет алғашқы қаражатты берді. Биыл бұл нысанның белсенді құрылысы жүргізіледі. Қазір жұмылдыру жұмыстары, сондай-ақ техника бойынша, LRT-де жұмыс істейтін болашақ сапарлар бойынша аванстық төлемдер жүріп жатыр. 2023-2024 жыл ішінде жоба іске асырылып, келесі жылдың соңына дейін қосылуы тиіс", - деді Жеңіс Қасымбек.
Еске салсақ, мемлекет басшысы елорданы дамыту жөніндегі жиында LRT жобасына жеке тоқталған.
«LRT-ға қатысты жұмысты мейлінше тездетіп аяқтау керек. Мен бұрын да айттым, LRT жобасы негізінен қате болды. Бірақ қазіргі таңда басқа амалымыз жоқ, бұл жобаны жүзеге асыруымыз керек. LRT-ның құрылысын тоқтатсақ, шығын одан да көп болады. Ал, балама жобалар жоқ. Жалпы, әкімдікке Үкіметпен бірлесіп, Астананың көлік жүйесін дамытуға арналған кешенді бағдарлама әзірлеуді тапсырамын», – деді Тоқаев.