Ақтөбелік шенеуніктер балабақшаға арналған жерді кәсіпкерге сатып жіберген, деп хабарлайды Ulysmedia.kz.
ТОЛЫҒЫРАҚ
Информбюро31 мәліметінше, Ақтөбенің Бауырластар-3 ықшам ауданында тұрғындар жергілікті шенеуніктердің шешіміне қарсы шығып, даулы құрылысты тоқтатты. Олар балабақшаға арналуы тиіс жердің жеке кәсіпкерге сатылғанын біліп, наразылық танытқан.
БАЛАБАҚШАНЫҢ ОРНЫНА КОММЕРЦИЯЛЫҚ НЫСАН
Көлік жөндеу орталығының құрылысы бір апта бұрын басталып кеткен. 30 соттық аумаққа коммерциялық ғимарат тұрғызу жоспарланған. Жұмысшылар қазірдің өзінде іргетасын құйып, кірпіш қалап жатқан. Алайда тұрғындар жұмысты тоқтатуды талап етіп, құрылыс алаңына жиналған.
- Әкімдік бұл жерге бірнеше рет балабақша салынады деп уәде еткен. Енді келіп, бизнес орталық тұрғызылмақ. Бұл — халықты алдау, дейді тұрғындар.
“БЕС БАЛАМ БАР, ЕШҚАЙСЫ БАЛАБАҚШАҒА БАРМАЙДЫ”
- Менің бес балам бар. Бәрі де балабақша жасында. Бұл жер кезінде үкімет тарапынан арнайы балабақшаға деп бөлінген. Ал қазір қарап отырсақ, құжат бойынша бұл жер жеке кәсіпкерге тиесілі коммерциялық мақсаттағы аумақ, дейді аудан тұрғыны Алмаз Жақсыбеков.
Балабақшаға орын жетіспеушілігі – басты проблема. Тұрғындар ұл-қыздарын көрші аудандарға апарып жүргендерін, ал ол жақта да орын тапшы екенін алға тартады.
- Балалар ойнайтын алаң жоқ. Енді міне, балабақша салатын орын да жоқ болып отыр. Ал жер қатынастары бөлімі ("земельныйдағылар") бұл жерді аукцион арқылы сатып жіберген. Сондықтан да құрылыс басталғанын көріп, бірден тоқтаттық, дейді аудан тұрғыны Анет Сарин.
АУКЦИОН АРҚЫЛЫ САТЫЛҒАН ЖЕР
- Бұл жер 2022 жылдың шілде айында аукцион арқылы сатылған. 2023 жылы қыркүйекте жобалау-сметалық құжаттама (АПЗ – архитектурно-планировочное задание) мақұлданған. Онда нысан «диагностикалық орталық пен дүкен» ретінде көрсетілген. Алайда егжей-тегжейлі жоспарлау жобасында бұл жер нақты балабақшаға арналған, дейді Ақтөбе жер мониторингі коммуналдық мекемесінің басшысы Алмат Сқақов.
Оның айтуынша, кәсіпкермен келіссөз жүргізілген, енді жобаны өзгертіп, балабақша салу жағы қарастырылуда.
Шенеуніктердің бұл уәдесіне тұрғындар сене бермейді. Олар құрылысты өз бақылауына алатынын айтып отыр. Күндіз-түні кезекшілік ұйымдастырып, жердің басқа мақсатта пайдаланылуына жол бермейміз дейді.