Түркістан облысында сегізінші сыныптың оқушысын зорлады деп айыпталған 37 жастағы азамат өмір бойына бас бостандығынан айырылды, деп хабарлайды Ulysmedia.kz.
КІНӘСІ ДӘЛЕЛДЕНДІ
Оның жасөспірім қызға азғындық жасағаны толық дәлелденді. Бірақ ауыр жаза арқалаған сотталушы кінәсін мойындаған жоқ.
ОҚИҒА ҚАШАН БОЛДЫ
Информбюро31 мәліметінше, оқиға биыл наурыз айында Түркістан облысының Келес ауданында болған. Жәбірленушінің анасы қызының жүкті екенін оның іші білінген кезде ғана аңғарған. Емханаға апарғанда дәрігерлер жасөспірімнің жеті айлық құрсақ көтергенін анықтаған. Тағы бір сорақысы – қыз көрген қорлығын ешкімге тіс жармай келген. Мұғалімдері де шәкіртінің жағдайынан бейхабар болған.
ТЕРГЕУ
Анасы шындықты білген соң бірден құқық қорғау органдарына хабар берген. Тергеу материалдарына сәйкес, күдікті көрші үйіндегі әпкесіне келіп, жұмыс істеп жүрген. Оның өзі үйлі-баранды: әйелі мен екі баласы бар. Соған қарамастан, ол арам ойын жүзеге асырып, жасөспірімді ұзақ уақыт бойы қорқытып, зорлық көрсеткені дәлелденген.