Өңірлік көлік прокуратурасының қызметкері қатысқан алаяқтық ісі бойынша сот тергеуі аяқталды. Бұрынғы мемлекеттік қызметкер тек бас бостандығынан айырылып қана қоймай, қосымша жазалар алды, деп хабарлайды Ulysmedia.kz.
Істің мән-жайы
Lada.kz мәліметінше, сот материалдарына сәйкес, айыпталушылар И. (көлік прокуроры – ред.) және О. алдын ала келісіп, алдау және сенімді теріс пайдалану арқылы жәбірленуші С.-дан 2 500 000 теңге талап еткен. Бұл ақшаға олар жәбірленушіге қатысты қылмыстық іс бойынша жазаны еркі шектеуге ықпал етеміз деп уәде берген.
Мемлекеттік айыптаушы И.-ге екі жыл жеті ай мерзімге бас бостандығынан айыру жазасын тағайындауды сұрады. Ал О.-ға қатысты прокурор тараптардың татуласуына байланысты Қылмыстық кодекстің 68-бабы бойынша қылмыстық жауаптылықтан босатуды сұрады.
Екі айыпталушы да кінәсін мойындап, өкінгенін жеткізді. Қорғаушы да олар үшін неғұрлым жеңіл жаза тағайындауды қолдады.
Сот ұйғарымы
Айыпталушылардың кінәсі олардың өз мойындауларымен, жәбірленушінің айғақтарымен, заттай дәлелдермен және іс құжаттарымен дәлелденді. Сот И.-дің кәсіби антын бұзуын ауырлататын мән-жай деп таныды. О.-ға қатысты ауырлататын жағдай анықталған жоқ. Екі тарап үшін де кінәні толық мойындау, шынайы өкініш және кәмелет жасына толмаған балалардың болуы жеңілдететін жағдай ретінде есепке алынды.
Көлік прокуроры И. ҚК-нің 24-бабы 3-бөлігі (Қылмысқа оқталу) және 190-баптың 3-бөлігі 2-тармағы (лауазымды тұлғаның қызмет бабын пайдаланып жасаған алаяқтығы) бойынша кінәлі деп танылды. Оған екі жыл жеті ай мерзімге бас бостандығынан айыру жазасы тағайындалып, өмір бойы мемлекеттік қызметте, әкімдіктерде, Ұлттық банкте және квазимемлекеттік секторда лауазым атқару құқығынан айырылды.
О. ҚК-нің 24-бабы 3-бөлігі және 190-баптың 2-бөлігі 1-тармағы (алдын ала келісіп, топ болып жасалған алаяқтық) бойынша кінәлі деп танылды, бірақ ҚК-нің 68-бабы 1-бөлігіне сәйкес жәбірленушімен татуласуына байланысты қылмыстық жауаптылықтан босатылды.
Үкім әлі заңды күшіне енген жоқ және тараптар оны апелляцияға бере алады.