Мамандар Алматыдағы ауа ластаушы заттардың мөлшері жылдан жылға артып келе жатқанын тіркеп отыр, деп хабарлайды Ulysmedia.kz.
ТОЛЫҒЫРАҚ
Almaty air initiative қорының дерегінше, өткен жылы ауадағы ластаушы заттар көлемі 30 пайызға өскен. Әсіресе, ұсақ дисперсті бөлшектер — РМ2.5 аса қауіпті. Олар адам ағзасына терең еніп, вирустар мен аллергендерді тасымалдайды. Қыста жағдай жылыту маусымына байланысты одан әрі күрделене түседі.
– Мен ауадағы шекті мөлшерден асу көрсеткіші бізде жыл сайын тіркелетінін айтқан едім. Бұл бөлшектердің қауіптілігі — олардың өте ұсақтығында: өлшемі 2,5 микроннан да кіші. Бұл адам шашының қалыңдығынан 30–40 есе жіңішке. Соның арқасында олар тыныс алу жолдары арқылы түрлі ағзаларға, қанға дейін терең еніп кетеді. Бұған қоса, олар өзіне басқа да заттарды — вирустарды, бактерияларды, аллергендерді «жабыстырып алады». Бір жағынан олар шаттл сияқты жұмыс істеп, көптеген аурудың пайда болуына себеп болады, – дейді қордың жетекшісі Жұлдыз Саулебекова “Жетінші арнаға”.
Бұған дейін ғалымдар 2025 жылы Алматының орташа тұрғыны лас ауаның салдарынан «518 темекі шеккенмен» тең зиян шеккенін анықтаған. Бұл — қалада жай ғана өмір сүріп, тыныстаудың өзі шамамен 26 қорап темекі тартумен пара-пар деген сөз.