Астанада ақша жымқырған мектеп директоры мен бас есепшісі сотталды

ТОЛЫҒЫРАҚ

6 ақпанда Астана қаласының қылмыстық істер жөніндегі ауданаралық соты мектеп директоры және бас есепшіге қатысты үкім жариялады. 

МӘН-ЖАЙ

Сотта мектеп директоры бас бухгалтермен бірлесіп, қызметтік өкілеттіктерін пайдалана отырып, 2015 жылғы қазаннан 2024 жылғы тамызға дейін мекемеде іс жүзінде жұмыс істемеген алты еден жуушыны негізсіз табельге енгізіп отырғаны анықталды. Нәтижесінде шамамен 29 млн теңге көлемінде қаражат иемденіліп, ұрлық жасаған.

Бұдан бөлек, мектеп директоры 2015–2024 жылдар аралығында заңсыз түрде және жеке-дара шешім қабылдап, 501 білім алушыға білім беру қызметтерінің ақысына жалпы сомасы 183 млн теңге көлемінде жеңілдіктер беру туралы бұйрықтар шығарған. Мектеп жарғысына сәйкес мұндай жеңілдіктер қарастырылмаған, себебі оқу ақылы негізде жүзеге асырылған.

Осылайша, директор қызметтік өкілеттіктерін қызмет мүдделеріне қайшы пайдаланып, өзге тұлғаларға пайда мен артықшылықтар беру мақсатында әрекет етіп, мектептің құқықтары мен заңды мүдделеріне елеулі зиян келтірген.

Сонымен қатар, 2018 жылғы 1 қаңтардан 2024 жылғы 31 мамырға дейін директор мен бухгалтер мектеп жанынан «0» сыныптарды ұйымдастырып, ата-аналардан ақылы қызметтер үшін қолма-қол ақшаны бақылау-касса аппаратын қолданбай қабылдаған. Түскен қаражат мектептің есепшотына енгізілмей, бухгалтерлік есепте көрсетілмеген. 

ЖЫМҚЫРЫЛҒАН АҚША

Нәтижесінде 305 млн теңге көлемінде қаражат иемденіліп, жұмсалған.

Директор 2021–2024 жылдары жазғы лагерь қызметтері үшін алынған, КГУ есебінде көрсетілмеген, аса ірі мөлшердегі 25 млн теңге қаражатты да иемденген.

Сондай-ақ, 2017 жылғы қазаннан 2024 жылғы мамырға дейін директор шетелдік мұғалімдердің жалақысын жасанды және негізсіз түрде көтеру арқылы, делдалдар арқылы мектеп қаражатын жалпы сомасы 75 млн теңгеге иемденгені анықталды.

Ал бухгалтер 2017–2024 жылдары қылмыстық жолмен алынған бюджет қаражатын заңдастыру мақсатында шамамен 176 млн теңгені жеке депозиттік шотына аударып, 9 млн теңге көлемінде сыйақы алған.

ТАРАПТАРДЫҢ ҰСТАНЫМЫ

Прокурор мектеп директоры және бухгалтерге 7 жыл мерзімге бас бостандығынан айыру жазасын, мүлкін тәркілеумен және өмір бойына белгілі бір лауазымдарды атқару құқығынан айыруды сұрады.

Сотталушылар кінәларын мойындамады. Қорғау тарапы олардың әрекеттерінде қылмыс құрамы болмауына байланысты ақтауды сұрады.

Сотталушылардың кінәсі жәбірленуші өкілдерінің, куәлардың айғақтарымен, мамандардың қорытындыларымен және сотқа дейінгі тергеп-тексеру барысында алынған заттай дәлелдемелермен дәлелденді.

СОТ ҮКІМІ

Жаза тағайындау кезінде сот мынадай жеңілдететін мән-жайларды ескерді: директордың зейнеткерлік жаста болуы (65 жас), бухгалтердің үш кәмелетке толмаған баласының болуы. Ауырлататын мән-жайлар анықталған жоқ.

2015–2024 жылдар аралығында жасалған ауыр сыбайлас жемқорлық қылмысының мән-жайларын, аса ірі мөлшердегі өтелмеген залалды, қылмыстың ұзақ уақыт бойы жасалғанын ескере отырып, сот мектеп директорын 8 жыл мерзімге бас бостандығынан айыру жазасын, екі қабатты тұрғын үйін, автотұрақ орнын және зергерлік бұйымдарын тәркілеумен тағайындады.

Бухгалтерге 7 жыл мерзімге бас бостандығынан айыру жазасы, автокөлігін, автотұрақ орнын және зергерлік бұйымдарын тәркілеумен тағайындалды. Үш кәмелетке толмаған баласының болуына байланысты бас бостандығынан айыру жазасын өтеу 1 жылға кейінге қалдырылды.

Азаматтық талап 588 млн теңге көлемінде қанағаттандырылды. Үкім заңды күшіне енген жоқ.