Сәтбаев қаласында 1974 жылы салынған апатты үйде шамамен 60 отбасы әлі күнге дейін тұрып жатыр. Ғимарат 2024 жылы қауіпті деп танылғанымен, екі жыл ішінде тұрғындардың ешқайсысы басқа жерге көшірілмеген. Үйдің қабырғалары жарылып, ғимарат шөгіп барады. Ал оның жағдайын бағалайтын комиссия әлі құрылмаған, деп хабарлайды Ulysmedia.kz.
Тұрғындар қалай өмір сүріп жатыр?
Үйдің қабырғаларында жарықтар пайда болып, есік-терезелер қисайып кеткен. Тұрғындар әсіресе қыс мезгіліне алаңдайды. Зақымданған қабырғалар жылуды нашар ұстайды, ал аяз ғимараттың жағдайын одан әрі нашарлатуы мүмкін.
Үй тұрғыны Рашида Тұқаева күнделікті қандай қиындықтарға тап болып отырғанын айтып берді.
– Ұйықтар алдында түнде үй құлап кетпей, таңертең аман оянуымызды тілеп дұға етеміз. Үйдің апатты жағдайда екені туралы қорытындыны бізге тек 2024 жылы берді, бірақ екі жыл өтсе де, бізді көшірген жоқ. Әкімдер ауысады, ал біз өз мәселемізбен қала береміз, – деді ол.
Отбасылардың бірі екі жылдан бері пәтер жалдап тұруға мәжбүр. Үй тұрғыны Сәтбай Сералин бұл ғимаратта тұру мүмкін емес екенін айтты.
– Барлық қабырға жарылып жатыр. Үй ортасынан, үшінші және екінші кіреберістің арасынан майысып барады. Әкімдіктен көмек сұраймыз. Не баспана берсін, не өтемақы төлесін, – деді ол.
Әкімдік не істеп жатыр?
Тұрғындардың шағымынан кейін әкімдік өкілдері ғимаратты тексерген.
Сәтбаев қаласы тұрғын үй инспекциясы секторының меңгерушісі Гүлмира Нұрманованың айтуынша, комиссия осы аптаның соңына дейін құрылып, оның қорытындысы келесі аптаның басында жарияланады. Көп тұрғынның басқа баспана жалдауға немесе пәтер сатып алуға қаржылық мүмкіндігі жоқ.
Сәтбаев қаласында барлығы 28 апатты және 223 ескі үй бар.
Контекст
Еске салайық, Қазақстан бойынша 59 мыңнан астам тұрғын үйдің ішінде 1 037-сі апатты деп тіркелген. Тағы 2 165 үй ескі деп танылған.
Жаңғырту жұмыстарын жеделдету үшін мемлекет Құрылыс кодексі арқылы жаңа тетік енгізіп жатыр. Ол жаңғырту жобаларына мемлекеттік кепілдік беруді көздейді.
Құрылыс салушылар меншік иелеріне құны мен сипаттамасы жағынан тең баспана, ақшалай өтемақы немесе басқа үйлерден пәтер ұсына алады.