Алматыда селфи жасаймын деп гүлдерді таптап, гүлзардың сәнін қашырғандар көбейген. Басым көпшілігі абаттандыру ережесін бұзғаны үшін әкімшілік жауап қарастырылғанын білмейді. Әкімдіктегілер заңға сай, өсімдіктерді зақымдаған тұрғындарға 73 мың теңге айыппұл салынатынын еске салды, деп хабарлайды Ulysmedia.kz КТК телеарнасына сілтеме жасап.
Көктем шыға Алматы гүлденіп, мың бояуға малынады. Өкініштісі, жайқалған гүлдердің үстінде селфи жасаймын деп, өсімдіктерді таптап тастайтындар көбейген. Мәселен, сан түрлі гүлдер өсіп тұрған алаңға қараңыз, әр жерде ұзыннан-ұзақ созылған іздер жатыр. Тапталып қалған гүлдер қурап, шіріп кеткен. Суретке түсуге құмарлардың кесірінен гүлзардың сәні қашқан. Кейбірі тіпті бала-шағасымен де кіріп кетеді екен.
“Адамның санасына байланысты. Тәрбие көрмеген шығар. Солай деп ойлаймын. Қоршаған ортамызды ластап, қаншама еңбекке отырғызғанды таптап, жұлады. Түрлі видео түсіреді,”- дейді қала тұрғыны Әлішер Жандосұлы.
Ал, сол гүлдерге жауапты жандар еңбектерінің еш кетіп жатырғанына қапаланады.
“Орталық саябақтарға гүл отырғызамыз. Кілемдей етіп, Бірақ иттерімен келіп,жаздай таптап кетеді. «Саябақта қыдырамыз, саябақ не үшін, қыдыру үшін» дейді. Ал біз сол адамдар үшін, елге жылу сыйлайтын гүлдерден ләззәт алса екен дейміз. Біздің еңбегімізді бағаламайды,”- дейді гүлдерді күтіп баптайтын Жеңісгүл Нұрданбек.
Табиғатқа немқұрай қарайтындарға қатысты әкімшілік жауапкершілік қарастырылған. Бірақ тұрғындардың көбі оны білмейтін сияқты. Сондықтан шенеуніктер айыппұлдың көлемін тағы бір еске салып шықты.
“Әлеуметтік желілерде тіркелген фактілерге байланысты департамент Алматы тұрғындары мен қонақтарын сәндік гүлді көгалдандыруға және қоғамдық орындарға қамқорлық жасауға шақырады. Ведомство қолданыстағы заңнамаға сәйкес, абаттандыру ережелерін бұзғаны үшін әкімшілік жауапкершілік қарастырылғанын еске салады. Жеке тұлғаларға ескерту немесе 20 АЕК, шағын кәсіпкерлік субъектілеріне 30 АЕК, орта кәсіпкерлік субъектілері үшін 40 АЕК, ірі кәсіпорындар үшін 100 АЕК айыппұл салынады,”- Алматы экология және қоршаған ортаны қорғау басқармасының бас маманы Нұркен Ақмырза.
Қаладағы гүлзарларды ешкім тәулік бойы бақылап отырмайды. Бірақ өсімдіктерді таптап жүргеніңізді тәртіп сақшылары байқап қалса, 73мың теңге айыппұл салынады.