Экология және табиғи ресурстар министрлігі мен Дүниежүзілік табиғат қоры (WWF International) арасында жолбарысты Қазақстан Республикасына реинтродукциялау бағдарламасын іске асыру жөніндегі ынтымақтастық туралы Меморандумға қол қойылды, деп хабарлайды Ulysmedia.kz.
“Бұл меморандум Іле-Балқаш табиғи резерватының биоәртүрлілігі мен инфрақұрылымын қалпына келтіруде елеулі жетістіктерге әкелген табысты және жемісті ынтымақтастықтың жалғасы. Жолбарыстың Қазақстанға оралуы – бұл экологиялық маңызды жоба ғана емес, сонымен қатар табиғи мұраны қалпына келтіру жөніндегі күш-жігеріміздің символы. Бұл бастама көптеген ұйымдар мен сарапшылардың жемісті ынтымақтастығының арқасында мүмкін болды”, – деп жазылған министрлік хабарламасында.
Биыл 27 маусымда Нидерландыда ҚР ЭТРМ орман шаруашылығы және жануарлар дүниесі комитеті мен “Landgoed Hoenderdaell” хайуанаттар бағындағы “Stichting Leeuw” мысықтар тұқымдасының жыртқыштарына арналған арнайы орталықпен ынтымақтастық туралы келісімге және екі амур жолбарысын (еркек пен ұрғашы) сыйға тарту туралы шартқа қол қойылды. Олар “Іле-Балқаш” мемлекеттік табиғи резерватына биыл күзде көшіріледі деп жоспарланған.
“Амур мен Тұран жолбарысының генетикалық жақындығы реинтродукция үшін ішкі түрлерді таңдауды алдын-ала анықтады. Жолбарыстардың барлық ішкі түрлерінің ішінде тек амур және Тұран ғана нағыз қыс жағдайында өмір сүруге бейімделген, сондықтан Қазақстанда Амур жолбарыстарын қайта енгізу үшін пайдалану жаңа экологиялық жағдайларға бейімделу процесін жеңілдететінін атап өткен жөн”, – деп жазылған хабарламада.