Батыс Қазақстанның 61 жастағы тұрғыны Украинадағы соғыста көз жұмды. Ол ресейлік үгіт-насихатқа иланып қалған, деп хабарлайды Ulysmedia.kz.
Батыс Қазақстан облысы Бөрлі ауданының 61 жастағы тұрғыны Ресей тарапынан Украинаға соғысуға кеткені жөнінде журналист Лұқпан Ахмедьяров айтып берді.
Марқұмның туыстары ер адамның Орынбор облысының тумасы, этникалық қазақ екенін және Қазақстанда 30 жыл тұрғанын айтады.
– Қазақстанда ол өзінің шаруа қожалығын ұстаған. Ресейлік насихатқа қатты иланып қалған, өйткені ол үйде тек ресейлік телеарналарды көрген. 2023 жылдың соңында ол туыстарына Ресейге кетіп, соғысқа өз еркімен барғысы келетінін айтқан. Туыстары оған “бұл идеядан бас тарт” деп көндіруге тырысыпты, бірақ ер адам табанды түрде "украин әскерилері орыс балаларын өлтіріп жатыр және барлық украиндар нацистер жойылуы керек" деп кетіп қалған, – дейді журналист.
2023 жылдың қарашасында ол Ресей азаматтығын алып, қартайғанына қарамастан, әскер қатарына қабылданған. "Град" қондырғысының зеңбірекшісі ретінде майданға кірген.
2024 жылдың қаңтарында ол жарақат алып, тез жазылып, қайтадан майдан шебіне кеткен. 2024 жылдың ақпанында туыстарымен байланысы үзіліп, 2024 жылдың тамызына дейін хабар-ошарсыз кеткен.
2024 жылдың тамызында ер адам қызмет еткен бөлімше командирі жұбайымен байланысқа шығып, ер адамның сүйегі табылып, Ростов қаласындағы мәйітханаға жеткізілгенін хабарлаған. Мырыш табыттағы оның денесінің қалдығы еліне жеткізілген.
"Зомбоящик" кінәлі
Осы оқиғаны айтқан туысы Қазақстан билігі әлі күнге дейін ресейлік телеарналарды шектемей отырғанына наразылығын білдірген.
– Оның ресейлік үгіт-насихатқа қатты иланып қалғанына теледидар кінәлі. Ол "зомбоящикті" тәулік бойы көрді. Өз шаруашылығынан мүлде бас тартты. Соғысқа бармауға көндірген барлық туыстарымен ұрсысып қалды. "Украиналық сарбаздар сегіз жасар орыс баласын өлтірді, баланың артына жұлдыз тіліп, ішектерін машиналарға орады" деген сандырақты үнемі қайталанып отырды. Біз оған бұл жабайы өтірік екенін айтқан кезде, ол ант беріп, оны теледидардан көргенін айтты. Біздің туысымыз жалғыз емес. Қазақстанда мұндай теледидарды көретіндер өте көп. Неліктен Қазақстанда бұл ресейлік арналар жабылмайды? Неліктен оларға Қазақстан аумағында хабар таратуға рұқсат етіледі? - дейді марқұмның туысы.
Бұған дейін Ресей Үндістанның 90-нан астам азаматын алдап, Украинаға соғысуға жібергені белгілі болған еді.