Жаңқош Тұраров әлі жауапкершілікке тартылған жоқ. Бұл туралы Әнару Қалдыбекқызының адвокаты Лаззат Ахатова мәлімдеді, деп хабарлайды Ulysmedia.kz.
ІС БАРЫСЫ
Әнрау Қалдыбекқызы Құрманәлінің Жанқош Тұраровқа қатысты жазған арызы бойынша қозғалған іс туралы біраз журналист хабарласты. Іс аяқталды ма, қалай боп жатыр деп сұрайды. Біраз адамның көкейінде де сол сұрақ шығар. Біршама тоқталайын. Іс аяқталған жоқ. Ешқандай татуласу туралы әңгіме де, ниет те жоқ. Әлі тергеу жұмысы жалғасып жатыр. Нақтысында тергеу органы сараптама қорытындысын күтіп отыр. Осы жерде тағы да ерекше тоқталып өткім келетіні – сараптама тағайындалғанда, тергеу тарапынан өрескел заңсыздықтарға жол берілген – деді адвокат.
КІНӘЛІЛЕР КӨБЕЮІ МҮМКІН
Оның сөзіне қарағанда, сараптама дәрігер-проктологтың қатысуынсыз өткізілген.
Біріншіден, сараптама дәрігер-проктологтың қатысуынсыз өткізілген. Ондай зорлық жағдайында сараптама міндетті түрде дәрігердің қатысуымен жасалу керек. Екіншіден, сараптама кеш жасалған. Арыз бергеннен бес күннен кейін жасалған. Яғни тергеу тарапынан күдікті (күдікті де емес, куәгер етіп өткізген) жаққа жақтасу, тіпті ҚЫЛМЫСТЫ ЖАСЫРУ орын алған деп есептейміз. Ана жақтың шіреніп жүргені де осы себепті болса керек. Полиция мен ҰҚК-де “плотный” крышалары болса, кім болсын, солай шіренсе керек. Сараптаманы сатып алғандай, сөздері ірі, әйтеуір. Бізде сатылмайтын не қалды өзі?.. Бұл жерде біз барлық вариантқа моральды түрде дайын отырмыз. Сарапшыларды сатылды деуден аулақпын. Өз міндетін адал орындайтын мамандар аз емес қой. Жалпы айтылған сөз – деді Лаззат Ахатова.
“КӨП НӘРСЕ АЙТА АЛМАЙМЫН”
Адвокаттың сөзінше, қазіргі таңда сараптаманың қорытындысына қарап, әліптің артын бағып отыр. Бұрмалайтын болса, яғни заңсыз жасалғандықтан, теріс қорытынды шығатын болса, әрине шағым жазып, комиссиямен қайта қарауға талап қоятынын ескертті заңгер.
Сонша ұзатқандарына қарағанда, 28 қыркүйек күні бокстан өтетін бой ма, халықаралық жарыс па, сол өтсін деп отыр ма деген де ой бар. Сосын тағы бір айта кететін жайт – істі жүргізіп жатқан тергеуші де, тергеу бөлімінің бастығы да жұмыстан кетіпті. Таяуда. Бұл кездейсоқтық па, сәйкестік пе, түсінбедік. Әзірге айтарым осы. Тергеу құпиясын жарияламау туралы қолхат бергендіктен, көп нәрсе айта алмаймын. Әйтпесе былықтың көкесі шығып жатыр. Мен қазіргі кейбір танымал жастардан (актриса, әнші, блогер дегендерден) шошиын дедім, шын айтсам. Біз қайда кетіп барамыз деп, қанша күннен бері шокта жүрмін. Басқа да қылмыстар анықталып жатыр. Олар да уақытысында айтылар. Мақсатымыз – біреудің айыбын ашу, кедергі жасау емес, кім болса да, жасаған қылмысы үшін, біреудің тағдырымен ойнағаны үшін әділетті жазасын алу керек деген ниет – дейді заңгер.